Wimbledon 2020 an khel dawn lo!

Ruahman lawk dan chuan 29 June aṭanga 12 July thleng hian Wimbledon 2020 khelh tur a ni. Mahse, hri lengin khawvel a tibuai a, All England Lawn Tennis Club chuan Nilaini zan khan thutlukna harsa tak hi an siam.

Kumin nipui laia neih tur Tokyo Olympic leh European Championship te chu nakkum atan sawn an lo ni tawh a, tennis inelna lian Wimbledon erawh a khelh hun sawn loa ṭhulh tawp a ni. Season kal laiah grass court inelna dang zawng zawng pawh a awm lo ang.

All England Lawn Tennis Club (AELTC) hian Wimbledon chungchanga thutlukna siam turin Association of Tennis Professionals (ATP) leh Women's Tennis Association (WTA) lam pawh an biak rawn tur thu an sawi a, ngun taka an ngaihtuah hnuah neih loh an rem ti.

AELTC chairman Ian Hewitt chuan, "Thutlukna hi harsa ti tak chunga siam a ni. Wimbledon 2020 neih a nih theih nana hma latu leh ngaihlutu zawng zawngte zah hle mah ila tunlai boruak thlirin hetianga tih hi a ngai rih.

"Indopui vang a nih ngawt loh chuan Wimbledon hi ṭhulh a ni ngai lo, kuminah erawh kum lo la awm leh zel tura ṭha taka kan neih zel theihna tur zawk a nih kan beisei. Mipui himna leh hriselna hi thil dang zawng aia kan dah pawimawh hmasak a ngai a ni," a ti.

Wimbledon khelh hmain hun a la tam a, inelna neih hunah meuh chuan hri leng hi a ziaawm hman pawh a ni mai thei. Mi ṭhenkhat chuan thutlukna hi an siam hma lutuk deuh nia ngai tawk pawh an awm - hetiang zawnga ngaihtuah hi a mak lem lo.

Mahse, tun dinhmunah tennis hi June thla thleng an chawl lailawk mek a, inelna lian Wimbledon hi khel dawn se la chuan neih a nih hmain grass court tournament lian lo zawk neih a ngai dawn; hri lengah chuan inelna lian lo pawh a him lo vek.

Britain sorkar chuan an ram chhungah mipui punkhawmna lampang chi a khap vek a, an ram dinhmun thlirin July thla vela khawvel hmun hrang hrang aṭanga mikhual thlen khawm chu an la zuam lo. Tennis thuneitu lam pawhin sorkar thu leh hla an ngaichang ve bawk a ni.

Coronavirus a hluar zual tirh khan April thla tir thleng tennis season chawlh lailawk a ni a, chumi hnuah June thla thleng pawhsei a ni. Tunah chuan a hma berah July 13 hma chuan inelna a awm dawn ta lo.

July thla tawp lam hian Hamburg, Bastad, Bucharest leh Lausanne-ah te tournament awm tura beisei a ni. Mahse, nipui laia neih tur Olympic sawn a ni tawh a, heng inelna bakah hian Toronto leh Montreal lam pawh an dinhmun a chiang ta bik lo a ni.

May thla a neih tur French Open chu September thla tawp atan an sawn tawh a, clay court inelna lian hian tournament tam tak a nghawng dawn. September thlatir lama neih tur US Open erawh a hun pangngaia neih theih an la beisei zel.

Wimbledon 2006 champion Amelie Mauresmo chuan, "Hri leng enkawlna damdawi a awm loh chuan tennis a khelh theih loh," tiin a lo sawi tawh a, tun season chhungin tluang takin an inkhel zui leh thei a ngem tih chu zawhna awm mek a ni.

Wimbledon khelh a ni lo tur hi sum leh pai zawnga chut chuan channa nasa tak a ni dawn a, hmingṭhat leh chungnung ber nih tuma inel player tan suma lei theih loh 'Hun ṭha' a liam ve bawk.

Grand Slam vawi 19 champion tawh Rafael Nadal tan Roger Federer-a record (20 titles) nih rual theihna kawng a ping rih. Champion lai leh tun season match a khelh zawng zawnga la chak vek Novak Djokovic tan a uiawm khawp ang.

Open Era china major title la hnem ber nih tum Serena Williams tan thla khat lek pawh a uiawm tawh. American star hian Margaret Court-i record (24) titles nih rual turin Grand Slam nomawi pakhat dang a la mamawh.

Season thara Wimbledon an khelh hunah chuan Serena hian kum 40 a hnaih tawh dawn. American player chuan, "Min barakhaih takzet," tiin grass court inelna lian an khelh loh tur chungchang a sawi.