Cricket World Cup Semifinal Tlai dar 3-ah India Vs New Zealand

Old Trafford Cricket Ground-ah India leh New Zealand ten vawiin tlai dar 3:00 hian Cricket World Cup Semifinal an khel dawn. July 11-ah champion lai Australia leh inelna thlengtu England ten semifinal hnuhnung zawk an khel ang.

Virat Kohli hote hi league round-ah pakhatna ni mah se July 14-a final khel tur chuan vawiina an chak ngei a ṭul. Captain pahnih Kohli leh Kane Williamson te hi 2008 Under 19 World Cup semifinal-ah khan inhmachhawnin India hi wicket thumin hnehna an chang.

India leh New Zealand te hi league round-ah ruahsur vangin an inkhel thei lo a, Men in Blue hian a bak match riatah England chiah hneh loin a bak match sarihah an chak vek.

Black Caps hian match hmasa parukah hnehna an chang vek a, amaherawhchu match hnuhnung pathumah Pakistan, Australia leh England te an hneh lo. Team pahnih inkarah India record a ṭha zawk a, Men in Blue hian vawi 55 hnehna chang tawhin Black Caps hian vawi 45-ah hnehna an chang ve bawk. World Cup bikah erawh New Zealand hi vawi li chakin India hi vawi thum an chak thung.

India-in tun World Cup ringawta run 647 vaw chhuak tawh Rohit Sharma an kawl a, KL Rahul leh Virat Kohli te an la awm bawk avangin top order hi chu an chakna tih a chiang. Amaherawhchu middle order bawk hi an buaina a ni leh ṭhin.

Chutihrualin bowling lamah India-in Jasprit Bumrah an kawl a, eng pitch-ah pawh Bumrah anga bowler ṭha hi chu hmachhawn a huphurhawm reng. New Zealand pawh batting hi an ṭhatna a ni a, Kane Williamson hian team a kaihruai ṭha bawk. All rounder James Neesham leh Colin de Grandhomme-te a hunah an rawn lang bawk a, team tlo tak an ni.

Amaherawhchu Williamson chungah rinna an nghat lutuk ṭhin a, batsman dang an rawn thawhchhuah a pawimawh ang.

India leh New Zealand inkhel tur hi British MET department thlirna aṭang chuan ruah vanga buai thei dinhmunah a ding a, chhum zing tam tura ngaih a ni a, ruah-surna chance 50% a awm bawk.

Amaherawhchu knockout stage-ah hi chuan ruahsur vanga an khel zo thei lo a nih pawhin an khelh hmabak hi Nilainiah khelh chhunzawm leh tur a ni a, inkhel en tur chu a awm ngei ang. India captain Kohli chuan, "Kan khingpui tur kan thlir lo a, kan khelh ṭhat loh chuan eng team pawhin min hneh thei tih kan hria. Keini chuan kan theihna anga khelhchhuah kan duh a, kan duh anga kan khelh phawt chuan hnehna kan chang ngei ang," tiin a sawi.