Copa America champion Brazil

Brazil chuan kum 12 chhung zet an nghah hnuah Copa America nomawi an chawi ta. Pathianni zan khan Peru 3-1 a hnehin South America ram tana football hmanga inelna sang berah a vawi kua nan an champion.

Maracana Stadium-ah mipui 70,000 chuang zet an inhnawh khawm a, striker Gabriel Jesus-a'n goal a khung bakah a ṭhiante khung tur a siamsak - Manchester City duhlai hi hnawhchhuah a nih zui avangin inkhel boruak siamtu leh chawk nungtu a ni chiang hle.

Brazil coach Tite-a'n a tih ṭhan dan pangngaiin Roberto Firmino chu tlarhma laiah dahin a thlawp turin mual sir lamah Jesus leh Everton Soares te a dah - tournament tir aṭangin tlarhnung erawh a ngaiin a rem chhunzawm.

Minute 15-na a ni a, mual sir lama ball changtu Jesus-a'n Peru defender pahnih a paltlang hnuin box chhungah a vawrh lut a, vengtu nei lo Everton-a'n ball kangin lei a thlen hma chiaha hlap nghalin goal hmahruai a khung.

Chawlhlawk hma deuhin Thiago Silva-a hand ball vangin Brazil lamin penalty an chawi a, 1975 hnua la champion leh lo Peru-in Paolo Guerrero hmangin si phurh an sut; Copa America game vawi ruk an khelh tawha Tite naute goal chhuah hmasa ber a ni hial.

First half hun pek belhah Brazil inkhel mawi kan hmu. Roberto Firmino-a'n mual ding lamah ṭha taka ball thununin Arthur a pe, Barcelona midfielder hian a hma a awm Jesus pe zui nghalin Man City striker-in rang zetin an goal hnihna a khung.

Second half-ah Brazil-in inkhel thunun mah se goal an khung belh thei bik lo. Minute 70-naah Jesus chu Peru defender Carlos Zambrano nen ball kang an inchuhna lamah a foul a, yellow card pahnihna pek a ni - inkhel tir lamah Yoshimar Yotun laka a chet mawi loh vanga card a hmuh tawh bawk avangin hnawhchhuah a ni.

Hnawhchhuah a nih danah kum 22 mi Jesus a lawm lo, khelmual sir tui um (water bottle) chu a chhuih per a, khelmual a chhuahsan pahin video assistant referee (VAR) monitor a nam sawk bawk. Minute 20 chhung a ṭhiante tlem zawk chunga khel turin a kalsan.

An kim loh hnuah Brazil an buai chuang lo, midfield khaikhawmtu Philippe Coutinho-a'n club lama a goal khung fo tawh dan angin hun ṭha a nei, box sira a ball chan chu mawi takin pet kum mah se goal ban hrulah a kal chhuak hlauh.

Hun tawp hma chiahin Peru defender Carlos Zambrano-a'n Everton a tih tluk avangin penalty a chawi let thung a, bench aṭanga rawn lut Richarlison chuan chak nemngheh nan a khung, jersey phelh meuha a goal khung a lawm (celebrate) chuan Brazil champion chaka an tuihal zia a lantir.

Brazil coach Tite chuan, "Copa America kan khelh ṭantirh khan fans lam beisei kan phak lo, khelmual pawn lama na tak taka min sawiselna zawng zawng pawh kha kan hre reng. Mahse, khang selna anka zawng zawng kha keini chuan chak nan kan hman phah zawk a ni.

"World Cup-ah khan nomawi chawi tum chunga hlawhtlin loh hrehawm zia kan hre tawh, tun ṭumah pawh khatiang kha a thleng nawn leh ang tih kan hlau hle. Amaherawhchu, kan phu ang ngeiin result ṭha kan nei ta a, fans lam pawhin an duh chu an hmuh ka ring," tiin goal an khung hnem loh lai pawh an tlarhnung phui a pawimawh zia chu a sawi nawn.

Peru coach Ricardo Gareca chuan, "Group stage-ah 5-0 ngawtin kan ngam lo, final-ah erawh kan inkhel tawk hle. Tun ṭumah hian chak lo mah ila nasa taka hma kan sawn dan hian min ti lawm a, natna kan tawrh karah hian lawmna tur chu a awm tho a ni.

"Brazil hian player duh thlan tur 1000 vel an nei, Uruguay pawhin 300 vel an nei, keini erawhin 50 bawr aṭangin ram aiawh tur thlan a ngai thung. Tawnhriat kan nei ṭha tawh a, tunah chuan player tam zawk nei thei tura thapui thawh chu Peru hmalakna tur pawimawh a ni ang," tiin a sawi.

Champion    Brazil

Pahnihna    Peru

Pathumna    Argentina

Top scorer    Everton, Brazil & Paolo Guerrero, Peru (3 Goals)

Best Player    Dani Alves, Brazil

Best Keeper    Alisson, Brazil

Fair Play Award    Brazil