USA aia thiam an awm lo

Hmeichhe World Cup final chu Pathianni zan khan khelh zawh a ni ta a, USA aia thiam an awm lo - vawi li an champion-na ni turin Netherlands chu 2-0 in an hneh. 

A zawna a vawi thum nana final khel USA tan Megan Rapinoe (penalty) leh Rose Lavelle te chuan second half-ah goal khat ve ve an khung a, Netherlands lamin a chhanletna tur an nei lo. United States boss Jill Ellis chuan, "Kan inkhelh zawh hlimah kha chuan ka ṭawng chhuak thei meuh lo a ni," tiin a tana World Cup nomawi hlutzia a sawi. 

World Cup vawi hnih an khelhnaa final lut Netherlands-in team ṭha lo zawk an ni tih an inhrechiang a, USA lakah attacking football khel loin nghet takin an inrem - counter attack-ah an innghat. 

Netherlands-in first half chu an chelh thei a, second half-ah erawh an ṭang tlang zo lo. Barcelona defender Stefanie van der Gragt-i'n Alex Morgan lakah a ke a khai sang hret a, VAR hmanga ennawn a nih hnuah penalty a chawi. 

US tan hliam vanga final-a khelh loh hial hlauhthawnawm hman Megan Rapinoe chuan 'cool' takin goal-ah a chantir - goal ruk khungin assist vawi thum a nei a, top scorer a ni nghal. 

USA-in penalty hmanga goal an khung aṭanga minute riatna lekah Rose Lavelle hmangin an goal hnihna chu 'cial zetin an khung lehnghal.

Defensive game khel Netherlands tan si hnih sut a beiseiawm tawh lo - goalkeeper Sari van Veenendaal chuan vawi li ngawt save ṭha zet zet a nei zawk hial. Oranje (Netherlands sawina)-in fak erawh an phu. Vawi hnih World Cup khelhna chauha final luh a ropui a, European champion team tan final-a chak loh hi result chhia a ni lo - an hma hun a eng. 

Hmeichhe World Cup-ah USA aia cham­pion phu an awm chuang lo. Match hmasa berah World Cup-a inhnehna nasa ber thlentirin Thailand chu 13-0 in an hneh nghal. 

US hian Chile (3-0) leh Sweden (2-0) an hneh zui a, group stage match thuma chak vek chungin final an lut - Spain, France leh England an hneh chho leh a, tunah chuan 1991, 1999 leh 2015-a an nomawi chawi an belhchhah ta. 

Kum 2007 khan Germany chuan World Cup nomawi an lo humhim tawh a, US hi Germany hnua Hmeichhe World Cup-a champion zawn leh thei hmasa ber an ni - tun inelnaah goal 26 an khung a, Hmeichhe World Cup tournament khata goal khung hnem ber record a ni. 

US hmeichhe team-in khelmual chhungah football hmuhnawm an pho chhuak a, a pawn lamah pawh chanchin an ngah hle - Rapinoe chuan world champion pawh ni se White House-ah a kal loh tur thu a sawi. 

US president Donald Trump chuan hei hi hrethiam loin Rapinoe hi na takin a sawisel a, an ram flag zah tur leh thu a sawi hmaa 'chak' phawt turin a hrilh - an champion ta a, White House nena an thawnthu zel tur hi hriat a chakawm. 

Semifinal-a England an hneh ṭumin striker Alex Morgan chuan thingpui in lem chungin a goal khung a lawm a, hei pawh hian sawisel a tawk nasa hle.