Gold Cup champion Mexico

CONCACAF Gold Cup final nimin zinga khelhah Mexico chuan United States 1-0 a hnehin an champion. Soldier Field, Chicago-a inkhelah hian Barcelona player hlui Jonathan dos Santos chuan minute 73-naah goal awmchhun a khung.

Mexico hian United States lakah inkhel an thunun a, chak phu zawk niin a vawi riat nan Gold Cup-ah an champion. A thlengtu United States erawh goal hmaa an hriam tawk loh avangin champion nomawi an hum thei lo a, pahnihnaah an lungawi a ṭul.

Gold Cup-ah hian Mexico forward Raúl Jiménez chu best player atan thlan a ni a, ani hian season liam ta khan Wolverhampton Wanderers tan Premier League-ah goal 13 zet a khung. Season thara Chelsea tana inlan tur kum 20 mi United States attacking midfielder Christian Pulisic chu best young player atan thlan a ni. Borussia Dortmund midfielder hlui Pulisic hian match rukah assist vawi thum leh goal thum a khung a, tun inelnaa assist tam ber a ni.

Canadian forward Jonathan David chuan minute 306 khelin match li-ah goal ruk a khung a, top scorer a ni. Kum 19 mi David hi Belgian club K.A.A. Gent tan a khel mek. Mexico keeper Guillermo Ochoa chu best goalkeeper atan thlan a ni. 

Gold Cup-ah hian video assistant referee (VAR) hman a la ni lo a, CONCACAF president Victor Montagliani chuan kum 2021 Gold Cup-ah VAR hman a nih tawh dawn thu a sawi.