Chelsea mualah chak lo hlim Liverpool

Premier League kar a zo a, FA Cup lamah English football ngainatute an inher leh thei ta - FA Cup round of 16 chu zanin hian khelh a ni dawn.

Chelsea chuan zanin dar 1:15 hian Liverpool an mikhual dawn a, he inkhel hi FA Cup fifth round-a inkhel 'hot' ber tur tia chhal ngam a ni. Liverpool hi Premier League-a match 18 chhung a zawna an chak tawh chu Watford-in tihtawpsakin 3-0 in an hneh a, an mood fuh loh lai tak a ni. 

Chelsea an danglam bik lo. Frank Lampard-a naute hi league-a an match hnuhnung berah Bournemouth nen 2-2 in an inhnehtawk a, an result a ropui lo. 

Chelsea manager Frank Lampard chuan hnehna chan ngei tuma Liverpool an mikhual tur thu a sawi a, "Kan theihna zawng zawng nen hnehna chan kan tum ang," a ti. 

Blues hi inelna hrang hranga an match hnuhnung paliah vawi khat chiah an chak a, league-ah Champions League khel phak tura an dinhmun a derthawng. Champions League round of 16 first leg-ah Bayern Munich chu 3-0 a an ngam loh avangin beisei a tlem a, FA Cup-a an tlak leh chuan Lampard tan mualphona a ni dawn. 

Super Frankie chuan, "Kan hmachhawn tur hi Liverpool an ni a, England-a team ṭha ber kan hneh lai hmuh duhin fans an lokal dawn a ni," a ti a, fan-te duh zawng pek a tum. 

Chelsea tan striker Tammy Abraham dinhmun a chiang lo a, Cherries hmachhawn thei lo striker hi Barcelona-ah inenkawl turin a kal. Mahse, Lampard-a'n Olivier Giroud leh Michy Batshuayi a la nei - Reds tlarhnung su hawng zo tur khawpin an ṭha ang em tih chu kan hre thuai dawn. 

Blues tan N'Golo Kante, Callum Hudson-Odoi leh Christian Pulisic te dinhmun a chiang lo bawk a, thil chiang taka lang chu an ṭhat dan berin Reds an hmachhawn dawn lo. Lampard chuan, "Premier League game tin kan ngaih pawimawh angin he game hi ka thlir dawn a, chak loh ka duh lo. Player pawh ka thlak nual dawn a, a chang chuan inthlak kual a ngai ve ṭhin," a ti. 

Kum 2006 khan Liverpool chuan FA Cup nomawi an chawi a, hun pangngaiah 3-3 a an inhnehtawk hnuin penalty-ah Liverpool an chak - hemi hnuah hian an champion leh tawh lo. 

Millennium Stadium, Cardiff-a inkhel hi a hunlaia captain ropui Steven Gerarrd khelh ṭhat em avangin 'The Steven Gerrard Final' tih hiala hriat a ni a, Reds fan-te thinlungah a cham reng. Mahse, Liverpool hi 'Gerrard Final' hnuah FA Cup-ah an champion leh tawh lo a, he nomawi hi chawi an chak leh tawh em em ang tih a chiang. 

Reds fan-te duhna puitlin turin coach Jurgen Klopp a ṭha tawk a, Stamford Bridge-a Chelsea hneh turin a player-ten theihna an nei. 

Watford laka tlawm hlim Liverpool hi Watford lakah chauh an khel chhe lo - Atletico Madrid lakah an tlawm tawh a, West Ham laka an chak pawh kha an vanneih vang tiin a sawi theih. 

Reds-in insiamṭhatna tur an nei tih chiang takin a lang a, captain inhliam Jordan Henderson awm lo chu an tuar tih a lang bawk - Chelsea tan Liverpool hmachhawn dawn rau rau chuan tun hi hun ṭha a ni. Hendo a la inlan thei dawn lo a, match hnuhnung pahniha inlan thei lo James Milner 'tal' hi a dam hman chuan Liverpool tan thawk huaina tham a tling dawn.  

Klopp-a'n fourth round replay-a Shrewsbury Town an hneh ṭumin Under 23 squad a lo khelhtir tawh a, zaninah Mohamed Salah, Roberto Firmino leh Sadio Mane te a chawlh hahdamtir a nih pawhin thil mak a ni lo ang.