Spurs U19 enkawl tur Mason

Tottenham Hotspur midfielder hlui Ryan Mason chu UEFA Youth League khel tur Spurs Under 19 coach atan ruat a ni a, February 2018-a hliam vanga football a chawlhsan hnua a hna nghet hmasa ber a ni. 

Kum 28 mi Mason hian Spurs-ah hian a football career a ṭan a, August 2016 khan Hull City a zawm. January 2017 khan Hull tan hian Stamford Bridge-ah a feh chhuak a, Premier League match-ah hian Chelsea defender Gary Cahill nen an lu an in tauh fuh. 

Khelmualah minute nga zet enkawl a nih hnuin oxygen pek a ni a, damdawi in panpui zui a ni. England tana vawi khat inlan hman midfielder hi a lu ruh a khi a, "Ka la dam ve hi ka vannei takzet a ni," tiin a lo sawi tawh hial. 

May 2017 khan club trai­ning zawm ve leh mah se a duh angin a khel hleithei lo a, mithiamte thurawn angin thla kua hnuah inkhelh a chawlhsan thu a puang zui - coaching lamah insawrbing zuiin Spurs U19 coach a ni dawn ta. 

Hetihlai hian Ports­mouth leh West Ham midfielder hlui Matt Taylor chuan Spurs U18 team a enkawl dawn a, Nigel Gibbs chu U17 leh U23 inkara assistant head of player development turin ruat a ni bawk.