I League chungah ISL a awm dawn?

India rama football inelna sang ber dinhmun luah rengtu I League chu division hniam zawk a ni dawn ta - nimin khan All India Football Federation executive committee chu New Delhi-ah an ṭhukhawm a, Indian Super League chu India rama top division a nih theih nan hma an la dawn. 

AIFF hian Asian Football Confederation hnenah ISL champion-in AFC Champions League an khelh theihna turin an dil dawn a, AFC lam hian hei hi an pawm sak chuan Indian Super League hi India rama football league sang ber a ni dawn tihna a ni. 

Nimina Indian football thuneitute an ṭhutkhawm hma hian ISL chu India rama league sang ber nih tir tumna a awm thu AIFF general secretary Kushal Das chuan a lo sawi ri tawh a, I League club ten hei hi an duh loh thu na taka sawiin court-a kalah hial AIFF an vau. 

I League club ten thu chhuak an neih takah chuan AIFF president Praful Patel chuan I League club neitute a kawm a, kalphung mumal tak an duan hma chu India rama league pahnih chu a kal dun zel tur thuin an inrem. Mahse, AIFF leh I League club-te ṭha takin an inbia emaw tih laiin club paruk Mohun Bagan, East Bengal, Churchill Brothers, Gokulam Kerala FC, Minerva Punjab FC leh Aizawl FC-te chuan Prime Minister Narendra Modi hnenah lehkha an thawn a, AIFF executive committee an nghak hman lo. 

I League club ṭhenkhat chet dan hian AIFF ngeng a chhun niin a lang a, Indian FA president Praful Patel chuan ṭha taka an indawrna a kal laia club ṭhenkhat hmalakna chu hriatthiam har a tih thu a sawi. Indian football hotu lian inhmukhawm hian AIFF Men’s Footballer of the Year atan Sunil Chhetri thlan a nih thu an puang a, AIFF Women’s Footballer of the Year atan Ashalata Devi an thlang bawk. Nimina AIFF exe-cutive committee-ah hian Mizoram Football Association honorary secretary Lalnghinglova Hmar pawh a tel a ni.