Goal sarih khung thei Atalanta

Pathianni zan khan Serie A match hnih a awm a, goal kua ngawt a luhnaah Atalanta chuan Lecce 7-2 in an luhchhuah. AS Roma chuan Cagliari 4-3 in an hneh ve bawk.

Lecce khelmuala fans lut tur chu coronavirus an kai em tih endik hmasak zel an ni. Hri leng vanga rilru khingbai taka an inkhelhnaah hian Atalanta tan Duvan Zapata chuan hattrick a siam a, Giulio Donati-a'n an mahni lamah a tih luh bakah Josip Ilicic, Luis Muriel leh Ruslan Malinovskyi ten goal khat ve ve an khung belh.

Season hmasa khan Atalanta hian Serie A bikah goal 77 khungin club malah goal an nei hnem ber, season kal laiah pawh goal 70 nei leh tawhin attacking game hmuhnawm an pho chhuak ṭhin. Serie A table-ah Atalanta hian point 48 hmuin palina an ni a, an mahni aia match khata khel hnem Roma aiin point thumin an sang zawk - season thara Champions League khel leh turin kawng dik an zawh mek.