A thiam pali chauh an awm ta

Wimbledon hmeichhe singles nomawi chawi tum inum boruak a sang a, tunah chuan a thiam pali - Serena Williams, Simona Halep, Barbora Strycova leh Elina Svitolina te chiah an dam tawh; semifinal hi zaninah khelh chhunzawm a ni ang.

Player la dam lai zingah Serena chauh hi Wimbledon title la tawh awmchhun a ni a, vawi sarih ngawt a champion tawh. Player dang pathum erawh All England Club-a final la lut lo vek an ni thung, thawnthu thar ziah an beisei dawn.

Simona Halep hi player beiseiawm, mahse Grand Slam champion ni hleithei lo a ni. French Open nimawi chawi tawh mah se inelna lian dangah beisei angin a khel chhuak zo lo ṭhin - kumin Wimbledon erawh a khel ṭha tluang hle.

Thawhlehni zan quarterfinal inkhelah Halep hian Zhang Shuai chu 7-6 (7-4), 6-1 in a hneh a, 2014 hnua a vawi khat nen semifinal a invaw kai. Romanian nula hian bul ṭan fuh loin, set hmasa zawkah 4-1 in hnufual hman mah se huaisen takin a bei let.

Kum 27 mi Halep chuan, "Set hmasa la tur kha chuan ka theihtawp ka chhuah tak meuh meuh a ni. Ka khingpui khan thahrui a ngah tih ka hria, set thum kan khel a nih chuan a harsa dawn tih pawh ka hrethiam sa, ka tum ang ngeiin set hnihnaah a service vawi hnih ka chhuhsak thei kha a lawmawm," a ti.

Seeded pasarihna Halep hi player la dam lai zinga seeded sang ber a ni a, semifinal-ah chuan Elina Svitolina nen an inhmachhawn leh ang. Seeded pariatna Svitolina hian inkhel dangah Karolina Muchova chu 7-5, 6-4 in a lo hneh ve thung a ni.

Halep ang bawkin Svitolina pawhin inkhel bul a ṭan fuh tawk lo, set hmasa zawkah 5-2 in a hnufual hman. Mahse, game hnuhnung panga a lak zawn bakah, set hnuhnung zawkah a khingpui service vawi khat chhuhsakin darkar khat leh minute 32 an inkhelh hnuah hnehna a chang.

Kum 24 mi Svitolina chuan, "Grand Slam semifinal ka khel ve dawn ta reng mai, ka tan chuan hriatthiam harsa khawpa lawmawm a ni. Semifinal hi ka tawpna a nih loh hram ka beisei," tiin Halep hneh chunga final luh a tum thu a sawi.

Serena Williams chuan amah ang bawka American player Alison Riske chu 6-4, 4-6, 6-3 in a hneh a, Grand Slam vawi 23 champion tawh hian major title la hnem ber Margaret Court (24 titles) nihrual turin match hnih chak bak a mamawh ta lo.

Kum 37 mi Serena hian All England Club bikah chuan a vawi riat nan champion a tum a, 2017 January thla a Australian Open title a lak hnuah Grand Slam final vawi hnih khelh leh tawh mah se a la champion leh loh avangin a tan 'a chiang' tih ngawt theih a ni bik lo ang.

American star Serena chuan, "Wimbledon semifinal lut tur chuan hun rei tak nghah a ngai tih ka hria, tun tournament kan khelh hma khan result ṭha ka nei lo a, inelna takah erawh ṭha taka ka khel chhuak thei hi ka lawm. Match lehpekah pawh duhthusama khelh ka tum ang," a ti.

Tualchhung hmeichhe singles player zinga dam awmchhun Johanna Konta beiseina a tawp, British number 1 hian Barbora Strycova lakah 4-1 in hmahruai hman mah se a chefuh chhunzawm lo, 7-6 (7-5), 6-1 in a chak lo zawkah a ṭang.

Kum 33 mi Strycova hian kumin Wimbledon hi atan Grand Slam hnuhnung ber a ni tawh mai thei tiin a sawi tawh a, a vawi khat nana semifinal a thleng hi chanchin mak danglam ve tak chu a ni - Serena Williams nen an inhmachhawn leh dawn.

Czech Republic nula Strycova chuan, "Kum 33 mi ka ni tawh a, ka inkhelh apiang hi ka hun hnuhnung a nih zel tawh avangin hlim leh nuamti taka awm zel ka duh. Match tina hnehna ka chan apiang hi a hlu bik a, semifinal-ah pawh nuamti takin ka khel leh tawp mai dawn a ni," tiin a sawi.