Hnahthial-in Lengpui an ṭahtir Lungchhuan tan Republic Veng an lian mah mah

Suzuki Gixxer SF 250 20th Inter Branch YMA Football Tournament hmuhnawmna ruahsurin a hliah bo thei lo a, inkhel hmuhnawm bikah Hnahthial Joint YMA leh Lengpui hun pangngaiah 4-4 in an inhnehtawk a, penalty shootout-ah Hnahthial 3-2 in an vannei. Last 16 inkhel hmasa berah Republic Vengin harsatna an tawk lo a, Lungchhuan 5-0 in an sawp.

NECS Cup finalist Republic Vengin team ṭha an ni tih nemngheh nan a tir aṭangin Lungchhuan lakah inkhel an thunun. 2005 champion Republic Veng tan Lalhriatpuia'n match thumah a vawi thum nan hattrick a siam a, top scorer tehfungah last 16 aṭanga teh tur a nih avangin goal thum chauh la khung ang a ni.

Republic Veng tan captain F. Lalrinpuia leh Lalruatfela ten goal khat ve ve an khung bawk. Coach PC Lalnunsiama kaihhruai team hian match thum an khelh tawhah goal 19 khung tawhin goal an la chhuah lo - keeper RS Lallawmzuala leh defender Lalmuanawma (Munez-a) te hoa tlarhnung inrem a la phui zel. Republic Veng hi la che ṭha mah se team ṭha an la hmachhawn lo tih erawh hriat a ṭha.

Hnahthialin kum sarih liam taa Red Ribbon Football-a an hneh tawh Lengpui chu penalty shootout hmang bawkin an hneh a, hun pangngaiah goal riat a luh avangin inkhel hmuhnawm bik a ni. Lengpuiin duhthusamin bul an ṭan a, minute 11 chhung lekin Larry Lalrin-awma leh F. Lalremsanga te hmangin 2-0 in hma an hruai hman. Amaherawhchu Hnahthial beiseina siam turin Jakob Vanlalhlimpuia'n box pawn aṭangin goal ropui a khung a, captain Isaac pawhin penalty hlah mah se a tihsual thup nan first half tawp hmain a ke vei lamin goal mawi a khung.

Second half-ah Lengpui bawkin bul an ṭan ṭha a, ṭan chiahah Larry-a'n a pet goal. Mahse Hnahthial an hnual phah lo a, Isaac-a'n mual sir aṭangin freekick hmangin goal ṭha a khung hnuah Ramdinthara'n 'cool' zetin keeper rawn chhuak hmuh hmaih loin a khung.

Lengpui lam tan captain F. Lalchhuanmawia chuan minute 71-naah an siphurh a sut a, inkhel hmuhnawm chhunzawm mah se goal a luh belh tawh lo. CYMA Football zawha veng tana inkhelh chawlhsan tum Rohmingthanga'n penalty a hlah a, amaherawhchu Pa Roa hi 2006 CYMA Football-a Lengpui champion puitu tiha hriat reng a ni zawk ang.

Penalty Shootout boruak sang chhoin Lengpui tan Lalremsanga leh Chhuantea te chiah in an khung thei a, Hnahthial tan Lalrinfela leh Lalrintluanga (Tutu-a) ten an khung hnuah hun pangngaia hlahtu captain Isaac rawn ding chhuakin chakna goal a khung.