Captain, Leader, Legend, Chhetri!

All India Football Federation chuan Thawhlehni khan AIFF Awards an puang a, India captain Sunil Chhetri chu AIFF Men’s Footballer of the Year atan thlan a ni. 

Chhetri hian AIFF Men’s Footballer of the Year chawimawina hi vawi ruk a dawnna chiah a ni a, vawi nga dawnga record a lo siam tawh chu vawi khatin a pun belh tir leh ta! India captain chuan, "Awards dawn tumin ka inkhel ngai lo. Mahse, kan hnathawhte hriatsak kan ni tih hriatna hian minti lawm a, thawkrim lehzual turin min fuih a ni," a ti. 

AIFF Women’s Footballer of the Year atan Ashalata Devi chu thlan a ni a, Abdul Sahal chuan Emerging Footballer of the Year chawimawina a dawng bawk. 

Kum 34 mi ni tawh mah se Indian football team rinrawl chu Sunil Chhetri a la ni reng a, Bengaluru FC striker hian Indian Super League lamah goal khung a bansan lo. 

Season hman zawh takah khan Chhetri hian Bengaluru chu ISL nomawi a chawipui a, league match 19-a khelhah goal kua khunga assist vawi thum neiin player pawimawh a ni. August 2018-a Asian Football Confede­ration-in Asian Icon-a a thlan Chhetri hian kuminah India tan Asian Cup a hmachhawn a, match hmasa bera 4-1 a Thailand an sawpna inkhelah goal hnih a khung. 

Chhetri hian kuminah ringawt India tan match nga khel tawhin goal nga a khung a, nikum khan match rukah goal riat a khung bawk. India captain sulhnu hi uanpui tham a ni. 

Hero Intercontinental Cup-ah India an inlan mek a, an match hmasa berah Tajikistan ngam lo mah se goal hnih a khung a, Lionel Messi tlanpelin ram tana inlan mek player zingah goal khung hnem pahnihna a ni. 

Chhetri hian Asian Cup-a Thailand laka goal a khung khan Messi hi a lo lehpel tawh a, Copa America-ah Barcelona forward hian a rawn lehpel ve leh. Intercontinental Cup-a Chhetri-a'n goal hnih a rawn khung khan Messi a lehpel leh chiah a, ram tan match 109-a khelhah goal 70 ngawt a khung tawh!

Messi hian ram tana khel mek zingah Cristiano Ronaldo (88 goals, 158 matches) chiah a tluk lo tawh a, ram tana goal khung hnem hrim hrim zingah top 10-ah a awm mek. 

Chhetri-a'n a vawi ruk nan AIFF Player of the Year chawimawina a dawng a, vawi khat aia tam he chawimawina dawng thei player dang pathum chiah an awm. 

Kerala striker ṭha mi IM Vijayan khan a vanglaiin he chawimawina hi vawi thum a lo dawng hman a, Indian footballer lar ber ang hiala chhal ngam Bhaichung Bhutia leh Joe Paul Ancheri ten vawi hnih ve ve he chawimawina hi an lo dawng tawh bawk. 

FPAI Indian Player of the Year-ah Chhetri hi vawi hnih thlan tawh a ni bawk a, 2016-17 khan Hero of the I-League-ah thlan a ni a, 2017-18 season-ah Hero of the Indian Super League-ah an thlang zui. Tun dinhmuna Indian player zinga Chhetri hnaih bertu chu Jeje Lalpekhlua a ni a, Mizo tlangval hian match 56-ah goal 23 a khung tawh - anni pahnih hnaih leh bertu Sandesh Jhingan chuan goal li a khung ve tawh!

India captain hian ram tana goal-a khungna kawngah goal khung theih bik riauna a nei - Chinese Taipei leh Maldives lakah goal a khung hnem ber a, vawi nga a hmachhawn tawh ve veah goal ruk ve ve a khung. 

Chhetri quality sawi nan ṭhenkhatin Chhetri hmachhawn team an sawinep ṭhin - mahse Bengaluru striker hian Syria lakah pawh goal hnih a khung tawh a, Asia khawmualpuia ram ṭha Oman leh Bahrain lakah pawh a khung tawh. 

South Korea lakah meuh pawh Chhetri hian goal a khung tawh a, CONCACAF Gold Cup khelh zawh taka quarterfinalist Curacao lakah pawh goal khat a nei tawh. 

Philippines, Cameroon, New Zealand leh Puerto Rico lakah pawh goal lo khung tawh Chhetri hian Turkmenistan leh UAE a ngam lo ber a, vawi thum a hmachhawn tawhah ram pahnih lakah hian a la khung lo ve ve. 

India tana Sunil Chhetri hlutna chu hun pawimawhah goal a khung thei hi a ni. Blue Tigers captain hian Asian Cup-ah match nga lek a la khel chungin goal li a khung tawh. 

FIFA World Cup qualifier-a match 12-a khelhah goal ruk a khung a, AFC Asian Cup qualifiers-ah match kua khelin goal li a khung - friendly match bikah chuan match 37 khelin goal 27 a khung. India-in a hriatreng tawh tur erawh 2008 AFC Challenge Cup final-a Tajikistan laka a hattrick siam kha a ni a, nomawi an chawi piah lamah kum rei tak hnuah Asian Cup 2011 khel turin an tling. 

Chhetri hian India tan vawi hnih hattrick a siam tawh a, Tajikistan hnuah hian 2010 khan friendly match-ah Vietnam lakah goal thum a khung. 

Chhetri hian 2007, 2011, 2013, 2014 leh 2017 khan AIFF Men’s Footballer of the Year chawimawina hi a lo dawng tawh a, tun ṭum award hi ISL leh I League coach-ten vote an thlak hnua thlan a ni. 

Hmeichhe footballer ṭha bera thlan Ashalata Devi hi defender a ni a, Tamil Nadu club Sethu FC tan Indian Women's League-ah a khel a, season hman zawh takah khan an champion - Maldives club New Radiant tan pawh a lo khel tawh. 

AIFF Men’s Emerging Footballer of the Year atan Sahal Abdul Samad chu thlan a ni a, India tana vawi thum inlan tawh midfielder hian ISL-ah Kerala Blasters tan a khel. Hmeichhe footballer ṭhangduang bera thlan Dangmei Grace hian ram tan match 37 khelin goal 14 a khung a, Manipur forward hi kum 23 mi lek ni mah se India tan player pawimawh a ni tawh.

Men’s Footballer of the Year    Sunil Chhetri 

Women’s Footballer of the Year    Ashalata Devi 

Men’s Emerging Footballer of the Year    Abdul Sahal 

Emerging Women’s Footballer of theYear    Dangmei Grace 

Best Referee    R Venkatesh, Tamil Nadu

Best Assistant Referee    Joseph Tony, Karnataka

Best Grassroots Development Programme    Jammu & Kashmir Football Association