AFCON quarterfinal a hmuhnawm dawn

Africa khawmualpuia ram leh ram inelna sang ber Africa Cup of Nations quarterfinal thawh hnihna chu zanin dar 9:30 hian khelh a ni dawn a, Ivory Coast leh Algeria an intawng dawn. 

AFCON group stage-ah Ivory Coast-in beisei phak lo mah se quarterfinal-ah erawh an insiamṭha a, group stage-a chak loh nei loa last 16 inhlangkai Mali chu 1-0 a hnehin a thiam pariat zingah an tel. 

Ivory Coast hian Arsenal nena sawi zawm hlawh mek Wilfried Zaha, Lille forward Nicolas Pepe leh Tottenham Hotspur defender Serge Aurier te an kawl a, nomawi chawi turin an ṭha tawk. 

Algeria tan chuan Riyad Mahrez neih ringawt pawh uanpui tham a ni a, Islam Slimani te ho bench-ah an dah theih miau avangin an squad a chhah tawk tihah inhnialna tur a awm lo. 

Group Stage match thumah Algeria hian hnehna an chang vek a, an hneh zingah Sadio Mane telna Senegal an tel tih hriat a ṭha. Round of 16-ah pawh team ṭha Guinea chu 3-0 in an sawp thei a, an inringtawk khawp ang. 

Zanlai dar 12:30-a khel tur Madagascar-in thil mak an thlentir zel thei dawn em tih chu hmuh chakawm zingah a tel a, an hmachhawn tur Tunisia hi minute 90 chhunga chak nei lo chunga quarterfinal lut an ni!

Group Stage match thumah an khingpui an inhnehtawkpui vek a, last 16-ah pawh Ghana an inhnehtawkpui - mahse penalty-ah an chak zui a, quarterfinal an lut. Zaninah chuan minute 90 chhunga chak ve ngei an tum tawh ang.