New Zealand hneh loin India an tla

New Zealand chuan nimin khan Old Trafford, Manchester-ah India chu run 18-a hnehin Cricket World Cup final an lut. Black Caps hian July 14 hian Lord's-ah Australia leh England chak zawk nen nomawi an inchuh ang. Kane Williamson hoten a zawnin World Cup final an lut a, Virat Kohli hote erawh hun pawimawhah an chetsual avangin kum li dang an ngah leh a ṭul dawn a ni.

Thawhlehnia Manchester khaw awm danah ruah a sur ngei dawn tih a lang a, chhum a zing avang leh khua a hnawn avangin a vawmtu tan dinhmun ṭhatna tur niin a lang. Heti chung hian coin toss-a vannei New Zealand captain Kane Williamson chuan vuak hmasak a thlang.

Kumin World Cup-ah New Zealand batsman-te an che ṭha tawk lo a, India bowler lakah pawh eng ruai an ang lo. Opener Martin Guptill chu run khat lek siamin a thi a, a kawppui Henry Nicholls pawhin run 28 chauh a siam.

Amaherawhchu ṭum danga team chhan chhuak ṭhintu captain Williamson-a'n (67) mawhphurhna rawn lain Ross Taylor (74) nen dinhmun ṭha zawkah Black Caps an rawh dah. Amaherawhchu New Zealand hian over 46.1-ah 211/5  chauh an siam avangin India chu dinhmun ṭha zawka ngaih a ni a, ruahsur vangin ni khatna a tawp.

Kumin World Cup semifinal-ah hian ni khat an dah chuang a, ruahsur vanga an khelh zo thei lo a nih chuan ni awlah hian khelh chhunzawm tur a ni. Ni hnihnaah pawh hian DLS Method hmang tur chuan India hian over 20 tal an bat hman a ngai a. Ruahsur vanga an khel zo thei lo a nih chuan league round-a pakhatna India-in final an lut ang.

Nimin tlai khan khelh chhunzawm a ni a, New Zealand-in ball 23 an hmachhawn aṭangin run 28 an siam. Black Caps an che ṭha thaw khat a, chutihrualin wicket thum latu India bowler-ten a tawp an khar ṭha tiin a sawi theih tho.

Batting line up nei ṭha India tan Black Caps target siam sak hi a tam lo niin a ngaih theih a, stats hmanga chak tur thlir lawkna 'win predictor'-ah phei chuan Men in Blue chak theih dan hi 98% ang hialin a chhut.

Infiamna khawvelah erawh engmah a sawi lawk theih loh tih a lang a, India batsman-ten Black Caps pacer te an ngam lo. Matt Henry chuan tun World Cup-a century vawi nga siam tawhtu Rohit Sharma chu run khat bak siamtir a remti lo. India batsman chhuanvawr dang Virat Kohli leh KL Rahul te pawhin run khat ve ve bak an siam lo.

Over 30.3-ah India-in wicket ruk an hloh tawh a, run 92 chauh an la siam bawk avangin New Zealand chu chak ngei tura ngaih an ni.

India beisei a chauh tawh hnuah Ravindra Jadeja leh Mahendra Singh Dhoni te hmangin beiseina thar an nei a, captain cool tiha sawi ṭhin Dhoni a fimkhur takin a bat. Kum 30 mi Jadeja-a'n huaisen takin Black Caps bowler-te rawn sawi sa a, six leh four vawi li ve ve siamin ball 58 lekah run 77 a siam.

Amaherawhchu 'risk la' Jadeja pawhin vanduai hun a nei a, over 47.5-naah Trent Boult-a ball vawm chu sang takah vuain Black Caps captain Williamson-a'n a man chat. India innghahna Dhoni-a'n six vaw ve lehin chak nan ball 11-ah run 25 an mamawh a, beisei a la awm.

Dhoni pawhin risk lain run khat siamna turah run hnih lain Martin Guptill-a'n wicket a vawm fuh chat avangin India innghahna Dhoni a 'out'. Men in Blue-in batsman dang an nei tawh lo - Bhuvneshwar Kumar (0) leh Yuzvendra Chahal (5) te an thih zui avangin over 49.3-ah an thi vek a, run 221 an siam chu final luh nan a tawk lo.

New Zealand run 18 in an chak

Toss-ah New Zealand an chak a, bat hmasak an thlang

Venue: Old Trafford, Manchester

New Zealand    239/8

Ross Taylor    74 (90)

Kane Williamson    67 (95)

Henry Nicholls    28 (51)

Bhuvneshwar Kumar    43/3

Ravindra Jadeja    34/1

Jasprit Bumrah    39/1

India 221 all out

Ravindra Jadeja    77 (59)

MS Dhoni    50 (72)

Rishabh Pant    32 (56)

Matt Henry    37/3

Mitchell Santner    34/2

Trent Boult    42/2