Indian football a buai leh ta! Court-ah kan kal dawn - Aizawl FC President

July 9, Thawhlehni khan All India Football Federation chu AIFF headquarters, Football House, Dwarka, New Delhi-ah an ṭhukhawm. 

Indian football-a thuneitu sang inhmukhawm hian I League club-te su nghing dawrh khawp thutlukna an siam a, Indian Super League tan AFC Champions League khelh theihna Asian Football Confederation hnenah an dil sak dawn.  

ISL champion-in Champions League an khel a nih chuan India rama league sang ber an ni dawn tihna a ni nghal a, hei hian zawi zawiin I League club a ti ral thei ang. 

AIFF thutlukna avang hian I League club-te chu kar tawp hian Delhi-ah an inhmu khawm dawn a, Aizawl FC neitu Robert Romawia Royte chuan, "Court-ah kan kal dawn," tiin Indian FA thutlukna an khin tur thu Vanglaini a hrilh. 

AIFF chuan meeting an neih zawh rual hian thuchhuah an siam nghal a, heta an sawi lan langsar ber chu I League aia Indian Super League-in ngaihven a hlawh zawk thu a ni. 

Indian FA chuan, "Tun hnai kum nga chhung khan national team-a player tam zawk chu ISL khel an ni a, TV lama inkhel entu leh stadium-a entu pawh I League ai chuan a ṭhangin an tam zawk a ni. "Hei mai hi a ni lo, AFC Club licensing criteria pawh an zawm ṭha zawk a, a bik takin Grass-roots leh Youth Development Programme an kalpui te pawh AFC-in a pawmpui thlap a ni," an ti a, ISL tana an dilna chu ṭha taka lo pawm sak turin Asian football-a thuneitu sang ber AFC an ngen. 

AIFF chuan AFC general secretary Dato Windsor John kaihhruaina hnuaiah Asian Football Confederation chu Indian football kalphung tur duan sak turin an ngen bawk a, Indian football-a thuneitu FSDL thlenga dawra hma la turin ngenna an thlen. 

July 3 khan I League club neitute chuan AIFF president Praful Patel bakah general secretary Kushal Das an hmu a, an hma hun chiang lo tak chungchang hi an lo sawi ho tawh. 

Pawl pahnih hruaitute an inhmuh zawh hian AIFF leh I League club thuneitute chuan thuchhuah inṭawm an siam a, league pahnih kaltir zel a, chumi chhunga ruahmanna ṭha zawk siam an tum thu an sawi. Mahse, I League club thu-neitute hian AIFF executive committee nghak hman loin India prime minister Narendra Modi hnenah lehkha an thawn a, Indian football chhan chhuak tura inrawlh turin an ngen. 

Hei tak hi AIFF chuan an ngaithiam lo a, "AIFF President-in club neitute a kawmna rilru nen chuan I League club neitute chet dan hi a inmil lo hle a, he thilah pawh hian AFC chu inrawlh turin kan ngen a ni," an ti. 

AIFF rawtna ang hian AFC-in lo pawmsak ta se I League club-te chu an ral riai riai dawn tihna a ni a, league pahnih a ṭhuanga kal reng lo hian ISL chu top division awmchhun a ni ang. 

ISL-a club neitu ten vaibelchhe 15 ngawta club hmun ruak an lei avangin inremna awm sa ang chuan ISL hian relegation a nei thei dawn lo. I League club-te chu champion pawh ni se ISL an khel thei dawn lo tihna a ni. Division sang ber pawh khel thei lo tur tan champion tuma sum insen vak vak chu insenna thlawn a ni dawn tihna a ni a, club tam zawk hmabak chu tun hma I League club ṭhenkhat ang thoa club 'tihtawp' a ni. 

I League club mai ni loin he thutlukna hian second division thlengin a nghawng dawn tihna a ni a, AFC-in AIFF ngenna a chhan dan a zirin Indian football-a la danglam dawrh thei. 

Indian FA thutlukna chung-changah Vanglaini chuan Aizawl FC president Robert Romawia Royte a bia a, Mizoram Sports Minister ni bawk chuan court an kal ngei tur thu Vanglaini a hrilh. 

RRR chuan, "Kar tawp hian Delhi-ah I League club-te kan inhmu khawm ang a, court-a kan kal dan tur chungchang kan ngaihtuah ang. Ukil rawihna tur sum pawh kan thawhkhawm tawh a, kan ukil chuan chakna chance 99.9% vel kan neih thu a sawi," tiin AIFF thutlukna an khin thlak theih a beisei.

Aizawl FC President chuan sawi zawmin, "AIFF thuneitute hian khawngaihna avanga I League-a la inhamtang hram hram angin min sawi fo a, keini bakah Churchill Brothers leh Mohun Bagan pawh ti zawng hian an sawi ṭhin. 

"Relegate anga min sawi ṭhin pawh kha season-ah khan a hniam ber kan ni lo a, an dan siamchawp hmanga relegate anga lang chauh kan ni. An khawngaihna dawng anga min sawi fo pawh hi kan lawm lo a ni," tiin a sawi.