Neymar-a'n PSG training a zawm lo

Barcelona-a kir leh tur anga sawi hlawh tak Neymar chuan Paris St-Germain pre-season training hmasa ber a zawm lo a, French club hian thuchhuah an siam nghal. 

"Paris St-Germain chuan a hun leh hmun ruatah Neymar-a'n training a zawm lo tih kan hria a, hemi tur hian club aṭangin phalna a la hmasa lo. Club chuan he thil thleng hi pawi a ti takzet a ni," an ti. 

PSG sporting director Leonardo chuan, "Kan lungawi tlanna a dawrtu an awm a nih chuan Neymar hi a chhuak thei ang. Mahse, tun thleng hi chuan amah lei duh thawm kan la hre lo. "PSG chuan he hmuna chama, he club ṭhanlen zelna tura tha thawh duh chiah kawl a duh a ni," a ti zui a, Neymar hralh mai hi a pawiti lo tihna a ni. 

Brazilian forward hian August 2017 khan PSG hi khawvela footballer manto ber ni turin Barcelona aṭangin a pan a, French club hian pound maktaduai 200 an inseng. Leonardo chuan, "Neymar nen hian kan inbe tawh a, kan inbiakna zawng zawng sawichhuah erawh a rem lo. A aiawhte nen pawh kan inbia a, thil chiang tak erawh kum thum chhung atan contract a la nei. Tunah chuan min dawrtu an awm rih lo a, sawi thui tur a awm rih lo," a ti. 

Hetihlai hian Neymar-a pa Neymar Sr chuan a fapa chu charity thil avanga Brazil-a la awm rih a nih thu a sawi a, ruahmanna chu kum khat chhung lo kalpui a nih tawh thu leh July 15-ah a fapa chu a kir tur thu a sawi.