Jacob-a tan Commonwealth Junior leh Youth gold medal

Khawvel hmaah Mizo hming a mawi leh ta. Nimin khan Commonwealth Weight-lifting Championship-ah Jacob Vanlaltluanga chuan India tan Junior leh Youth huangah gold medal pahnih a chawi chhuak.

Apia, Samoa-a inelna neihah Govt. Complex rawlthar Jacob-a hi 61kg huangah a inlan a, snatch 112kg, clean & jerk 130kg, total-ah 242kg chawiin hmun chungnung ber a luah. Vawiin hian Youth Olympic gold medalist Jeremy Lalrinnunga chu 67kg huangah a inlan ve thung ang.

Jeremy tan tun inelna hi Olympic 2020 qualifier a ni chhunzawm dawn. Inelna a hmachhawn tawhah Jeremy hi a chet ṭhat avangin Tokyo Olympic tel turin beiseina a nei sang a, tun ṭuma a inlan tur hi a hmalam hun hril tur zinga mi a ni.

Mizo rawlthar duhawm Jacob-a hian 2011 khan State Sports Coaching Centre, Govt Complex-ah weightlifting hi a luhchilh ṭan a, SYS coach Malsawma Khiangte kaihhruaina hnuaiah training a nei ṭan.

Jeremy Lalrinnunga leh Zakhuma te nen Jacob-a hi 2012 khan Army Boys-a training turin an tling a, hetah hian foreign coach Gubala Slovakia leh Mizo coach Zarzokima kaihhruaina hnuaiah an inzir chhunzawm.

Jacob hi Pune-ah hian 2012-2016 chhung an inzir a, 2017 aṭang khan India camp zawmin Patiala, Punjab-ah tun thlengin a awm. National leh international medal a la nual tawh a, nikum khan Asian Youth Weightlifting Championship-ah silver medal a lo chawi chhuak tawh a ni.

Weightlifting a luh-chilh tirha Jacob-a kaihruaitu SYS coach Malsawma Khiangte chuan, "Thu lawmawm kan nei fo a, tunah pawh thu lawmawm bik kan nei leh ta. Tlawm tak aṭanga kan bul ṭanna khan rah ṭha a chhuah zel a, senior huangah pawh medal tam zawk neih zel kan beisei," tiin Vanglaini a hrilh.