PSG-in goal an surtir

Paris St-Germain chuan an mikhualna ramah ESA Linas-Montlhery chu 6-0 ngawtin an sawp a, Ligue 1 champion hian French Cup last 32 lut turin harsatna an tawk lo. France rama six division club ESA Linas-Montlhery hian an mikhual lakah chhuan tur an nei lo, a khat mawi tawkin goal an chhuah reng.

Pathianni zan inkhelah hian PSG tan Edinson Cavani leh Pablo Sarabia ten goal hnih ve ve an khung a, kum 17 mi midfielder Adil Aouchiche leh Eric Maxim Choupo-Moting te chuan goal khat ve ve an khung bawk. Club pahnih dinhmun a inthlau a, ESA Linas-Montlhery player tam zawk chu PSG fans an ni, an club ṭan em em mai hmachhawn theihna hun an neih kha an damchhunga an sawi tur a tling tawh. An manager Stephane Cabrelli ngei pawh season tluana PSG inkhel en tura ticket nei (PSG season-ticket holder) a ni hial!

Cabrelli chuan, "Tunah hian kum 52 mi ka ni, kum ruk mi chauh ka nih lai aṭang khan Parc des Princes-ah inkhel en turin ka kal ṭhin. Season tluan maia kan player ṭan em em maite nena inhmachhawn theihna hun kan nei kha a nuamin a hlimawm takzet a ni," tiin a sawi.

ESA Linas-Montlhery hi Paris khawpui daifem lama awm Linas leh Montlhery te hming chawia phuah a ni a, mipui cheng pawh 7,000 vel chauh an ni. An club hi Wikipedia-ah hmuh tur an awm lo a, an player zingah tui dawt leh tui zem ilo siamtu (plumber) leh damdawi semtu (pharmacist) te pawh an awm nawk.