Champion tan harsa a awm rih lo

Wimbledon champion lai Novak Djokovic tan semifinal lut turin hna harsa paltlang tur a la awm rih lo. Nilaini zan khan Serbian tlangval hian David Goffin chu 6-4, 6-0, 6-2 a sawpin quarterfinal a paltlang.

World number 1 hian zaninah Roberto Bautista Agut a hmachhawn leh dawn, Serbian tlangval hian quarterfinal inkhel dangah Guido Pella chu 7-5, 6-4, 3-6, 6-3 in a lo hneh ve thung a ni. Seeded pakhatna Djoko-vic hian Wimbledon title pathumna leh Grand Slam nomawi 16-na ni bawk a beisei mek. Djokovic chuan, "Goffin khan bul a ṭan fuh a, baseline aṭanga ball a rawn vuak chhuah ṭhat ṭhin avangin a awlsam lo. Set hnuhnung pahnih awlsam taka ka lak theih kha chu ka ring phak lo," a ti.

World number 23 Goffin hian season hnih liam ta khan Monte Carlo-ah Djokovic hi a ngam a, tun ṭumah erawh Serbian tlangval hian a service vawi khat chauh a hloh a, break point vawi 10 a hmuh zinga vawi sarih ngawt a puitlin thei a ni. Semifinal-a Djokovic khingpui tur Roberto Bautista Agut hian Grand Slam quarterfinal a vawi khat paltlangna a ni a, atan inkhel awlsam a ni dawn lo. Agut chuan, "Tunah hian dai ngai loh ram nuamah ka cheng mek, thil hi ruahman leh duh angin a kaltluang a, Novak lakah pawh hlauhthawnna nei loin ka khel ang," a ti.