Reds tan Divock Origi a rinawm

Liverpool striker Divock Origi chuan Merseyside club tan rinawmna thu a tiam a, contract thar a ziak. Belgian striker contract rei zawng hi tarlan a ni lo a, 'hun rei zawk atan' tih zawngin an sawi. 

Kum 24 mi striker hi World Cup 2014-a a khelh ṭhat hnuin Liverpool-in pound maktaduai 10-in an lalut a, mahse a club Lille-ah season khat chu loan-a khelhtir leh phawt a ni. Reds tana a season hmasa pa­hnihah match 76 khelin goal 21 a khung a, mahse hliam vanga a insiamrem theih loh hnuin German club VfL Wolfsburg-ah loan-a kaltir a ni. 

Beisei a phak loh hnuin Reds-ah bawk a rawn kir a, hmun a chang lawk lo. December khan season liam taa Premier League-a a match hmasa ber a khel a, Merseyside derby-ah bench aṭanga luhtirin chakna goal a khung zui!

Champions League semifinal-ah Barcelona laka comeback ropui an lantir ṭumin goal hnih a khung a, final-ah Tottenham Hotspur lakah goal a khung bawk. 

Match pawimawha a chet ṭhat zar a zo a, contract thar a ziak ta. Liverpool manager Jurgen Klopp chuan, "Wolfsburg-ah khan beisei a phak lo a, a lo kir hnuah pawh chhuah a duh. "Mahse, nitinin hma a sawn zel a, chu chu training-naah pawh hmuh turin a awm a, goal pawimawh tak tak a khung zui. Tunah chuan player ṭha tak a ni leh ta a, a ni kan kawl chhunzawm thei hi kan lawm a ni," tiin a striker a fak.