Roger leh Rafa intawn lehna

British thuthar thehdarhtu lian BBC chuan 2008 Wimbledon final kha 'tennis match ropui ber' tiin a sawi hial a, inkhel hmuhnawm leh ropui lantirtu chu Roger Federer leh Rafael Nadal te an ni. Tennis player piang tawh zinga ropui lawrlak pahnih hi zanin hian a hmun ngai Centre Court, All England Club-ah semifinal khel turin an intawng leh dawn.

Wimbledon bika an intawn hnuhnung ber aṭangin season 11 a liam tawh a, thil danglam leh inthlakthleng a tam tawh hle. Thil thar tam tak rawn chhuak karah Roger leh Rafa te erawh an la pangngai reng a, tennis hmuhnawm an la chhawp chhuah bakah game zahawmna vawng nungtu an ni zel.

Federer leh Nadal te hi vawi 39 an inhmachhawn tawh a, record nei ṭha zawk Nadal-a'n vawi 24 hnehna a chang tawh. Wimbledon bikah chuan Federer-a'n 2-1 in hma a hruai, amaherawhchu 2008 Wimbledon final-ah darkar sarih deuh thaw an inkhelh hnuin Spanish tlangval hi 6-4, 6-4, 6-7 (5-7), 6-7 (8-10), 9-7 in a chak. 

Roger Federer chuan tennis chanchina bung thar ziak lehin Grand Slam mala match 100 chak thei hmasa ber a ni leh ta. Swiss star hian Nilaini zan quarterfinal-ah  Kei Nishikori chu darkar hnih leh minute 36 chhungin 4-6, 6-1, 6-4, 6-4 in a hneh, grass court inelna lianah hian a vawi 13 nan semifinal a inhlangkai.

Kum 37 mi, season 28 chhunga Grand Slam semifinal lut thei upa ber Federer chuan, "Inkhelh tur chauh ka ngaihtuah a, match 100 chak kha ka rilruah a awm hman lo. Centre Court ka chhuahsan dawn khan fans lamin autograph min dil a, ka sign laiin ka record siam an rawn sawi. Ni tak e, hetiang hun hi ka lo suangtuah phak ngai loh thil a ni," tiin a sawi.

Semifinal thlir nghalin, "Rafa hian hma a sawn em em a, inkhel hautak a ni dawn. Grass-ah a khel ṭha tluang hle, tun hma lama a service dan leh tuna a service dan a inthlau tawh a, ani nen kan intawng leh tur hi a huphurhawm rualin a nghahhlelhawm hle a ni," tiin a sawi.

Centre Court lama Federer hnehna lawm thawm a reh hnu rei vak lo hnuah Court One lamah Nadal chuan Sam Querrey 7-5, 6-2, 6-2 in a hneh a, vawi hnih a champion tawhna hmunah hian season dang zawng aiin a khel 

ṭha tluang mek.

Grand Slam vawi 18 champion tawh Nadal chuan, "Tuna hmabak chu Roger a ni ta. Ani nena intawn hi chu khawi hmun leh eng hun pawh ni se a hlu bik riau ṭhin, intawn theihna hun ṭha kan neih a liam ve zel a, tun ṭuma round sang taka kan inkhel leh tur hi ka nghakhlel.

"Ka service, backhand leh volley a ṭha chhunzawm zel a, hma ka sawn em tih chu sawi thei lo mah ila tun hma lama ka khelh ṭhat ṭhin ang kha ka tawng leh mek tih chu ka chiang," tiin a sawi. World number 2 nichunga seeded pathumna an pek hian inrintawkna a nei sang vet vet hle.