CYMA Football a nung chho zel Tuithiang Vs Durtlang Chanmari Vs Khawzawl
Suzuki Gixxer SF 250 20th Inter Branch YMA Football Tournament-ah a ruh no deuh an chhuak zel a, vawiin hian Lammualah last 16 match hnih dang a awm dawn. Inkhel hi Zonet leh LPS-ah live in a en theih a, Zonet hian YouTube channel-ah an pe chhuak bawk.
Chhun dar 12:00-ah Tuithiang leh Durtlang te an inkhel dawn a, tlai dar 2:00-ah Chanmari leh Khawzawl Joint te an inhmachhawn zui ang.
Tuithiang vs Durtlang
Tuithiang hian Chiahpui (2-2) leh Aizawl Venglai (0-0) penalty hmanga an hneh hnuin Chawnpui 3-1 in an hneh a, an khelh chhoh dan thlirin team khawng tak niin an lang lo. Durtlang-in Ngopa Joint (4-0) leh Sihphir (5-2) te an hneh a, quarterfinal lut turin an rinawm zawk.
Durtlang-ah hian player ṭha Lalliansanga (Notea), Laldinliana Varte, Jessy Vanlalmuana leh Lalchungnunga te an awm a, anmahni ṭantu zingah quarter-final-a Bethlehem Vengthlang leh Bawngkawn chak zawk nena an inkhelh hun thlir pawl an awm ang. Amaherawhchu football-ah chuan engpawh a thleng thei a, Hmangaihkima telna Tuithiang hian thilmak an thlentir thei tlat.
Chanmari Vs Khawzawl
Chanmari hian football-ah sulhnu ṭha tak an nei a, 90s bawr vel khan CYMA Football-ah final ṭum hnih an thleng tawh. Amaherawhchu Red Ribbon Football-a champion tawh Chanmari hian CYMA Football nomawi hi an la chawi ngai lo a, tun ṭumah pawh hian chawi duhin an tuihal. Tlai dar 2:00-a an hmachhawn tur Khawzawl erawh enliam mai theih an ni lo.
Last 16 lut turin Chanmari hian Zemabawk North (3-2) leh Zotlang (4-0) in an hneh a, an khingpui tur Khawzawl Joint-in Zanlawn (5-4) leh Mission Veng (3-1) te an hneh ve bawk. Chanmari tan Rochhingpuia a la pawimawh reng a, Khawzawl an hmachhawn hunah inelna ṭantirh lama an inrem loh dan anga tlarhma an rem dawn avangin an khelh dan tur hriat a châkawm hle.
Khawzawl lamin NorthEast United defender Robert Lalthlamuana bakah T. Lalnunpuia leh Vanlallawma te an kawl avangin chak thei dinhmunah an ding a, chutihrualin match hnih lekah goal nga an chhuah tawh avangin tlarhnung erawh inenfiah an mamawh hle.
Vawiin Inkhel Tur
M5 Tuithiang 12:00 PM Durtlang
M6 Chanmari 02:00 PM Khawzawl Joint
July13, Inrinni
M7 Bethlehem Vengthlang 12:00 PM Bawngkawn
M8 Ramhlun North 02:00 PM ITI Veng
Quarterfinal
July 15, Thawhṭanni
QF1 Hnahthial Joint 12:00 PM Salem Veng
QF2 Republic Veng 02:00 PM Armed Veng
July 16, Thawhlehni
QF3 Win of M6 12:00 PM Win of M8
QF4 Win of M5 02:00 PM Win of M7