Serena hmachhawn turin Halep a inpeih

Infiamna huang hrang hrangah player ropui bik an awm a, tunlai hmeichhe tennis huangah chuan Serena Williams hi midang chunga leng a ni satliah lo - Grand Slam nomawi a lak hmun thuma ṭhena hmun khat la phak pawh an awm lo!

American star hian zanin dar 6:30 hian Centre Court-ah Wimbledon final a khel dawn a, a khingpui tur Simona Halep chuan inkhel boruak sang hmachhawn tura a inpeih thu a sawi; inkhel hmuhnawm beisei ila kan ring sual lo ang.

Ningani zan All England Club-a semifinal inkhelah Serena hian minute 59 chhung lekin Barbora Strycova chu 6-1, 6-2 in a sawp a, kum 37 mi a nih tawh avangin hmeichhe player Grand Slam final lut thei upa ber a ni nghal.

Serena hian set hmasa zawkah game ngana leh ruknaah a khingpui service a chhuhsak a, tun inelna bika a vawi 44 nan aces vaw chhuakin set a la. Centre Court-a mipui thawm a ṭha a, set hnuhnung zawkah pawh game hnih chauh hloh chungin a tlang.

Semifinal inkhel dangah Halep pawhin harsatna a tawk bik lo, darkar khat leh minute 13 chhung chauhin Elina Svitolina 6-1, 6-3 in a hneh. Romanian nula hian a service vawi khat hloh ve mah se ṭum nga ngawt a chhuhsak let.

Halep hi player dang nena khaikhin chuan a ball vuak na tawk lo mah se a dahna hmun a fuh ṭhin a, baseline aṭanga rei tak chhung vaw let reng thei a nihna hi a ṭhatpui fo. Dawhtheihna sang tak nen a khel a nih chuan Serena tan pawh zuam sual theih tur a ni dawn.

Simona Halep hian 2014 khan Wimbledon semifinal a khel a, grass court inelna lianah chuan a thlen san ber a ni - a vawi khat nan final a khel dawn. A khingpui tur hi tawnhriat nei ṭha eltiang ni mah se a zam bik lo, nomawi chawi a tum ngam.

Kum 27 mi Halep chuan, "Serena hneh theihna turin hun ṭha ka neiah ka ngai. A thil lo tih tawh leh a sulhnu te ka zah a, mahse tunah chuan court chhungah kan inbei dawn. Ka tan chuan chona sang tak a ni dawn a, inkhel ropui leh hautak hmachhawn tur hian ka rilru pawh a inpeih tawh a ni," tiin a sawi.

World number 1 hlui Halep hian nikum khan French Open nomawi a chawi bakah Australian Open final a lut bawk. Ranking-ah a chungnung ber dinhmun luah fo tawh mah se player ropui zinga chhiar tel a duh a nih chuan Grand Slam nomawi tam zawk chawi a mamawh - a hmabak chu Serena a ni.

Player pahnih an intawn tawhnaah Serena zawkin 9-1 ngawtin hma a hruai fal thei a, Wimbledon bikah hian 2011 khan inkhelin Serena hi a chak. Sulhnu thlir chuan Halep dinhmun a ṭha lo, amaherawhchu a rilru a paukhauh tawh thu a sawi ngam a vangin inrintawkna a nei ang.

Kum 1973 daih tawh khan Margaret Court chuan Australian Open, French Open leh US Open nomawi a chawi kawp a, tennis a khelh hun chhunga major title a lak zat chu 24 a tling chiah bawk; Australian legend sulhnu hi player dang tana tluk theih a nih a rinawm loh.

Mahse, Serena hun a rawn inher chhuak a, American star hian tih theih loh tura ngaih chu a rawn dai ṭhiat zel. Tunah chuan Court-i record nihrual turin Serena tan nomawi pakhat chawi belh bak a ngai ta lo, a ban phak maiah a awm tawh tihna a ni.

Wimbledon vawi sarih champion tawh Serena chuan, "Final ka khel leh tur hi ka lawm, court chhung leh pawnah ka chanchinin sawi a hlawh tih ka hria, mahse ka buai phah lo ang. Dawhthei takin ka khel dawn a, record leh a chhehvelin min tih buai loh ka beisei," a ti.

Season hmasa khan Serena hian Court-i record nihrual theihna hun ṭha vawi hnih a nei a, mahse a hlawhtling lo. Wimbledon final-ah Angelique Kerber a ngam lo a, an rama inelna lian US Open final-ah pawh Naomi Osaka a hneh lo, kuminah rinkai ni mah se an inkhelh zawh hma chuan thil chiang a awm lo.