Hamilton a hlim lo?

Pathianni hian Eng­land-ah infiamna lian chi hrang hrang a thleng khawm dawn, tennis inelna ngaihhlut Wimbledon mipa singles final leh Cricket World Cup final a awm dawn - heng pahnih bakah hian British Grand Prix tlan a ni dawn bawk.

Mercedes driver Lewis Hamilton chuan kartawp thlirlawkin, "Ni inanga hetiang thil a thleng rual ṭhup hi chu a fuh lo. British GP tlan hun tura ruahman hi a fuh tawk lo deuh a ni, Pathianni a lo thleng ang a mipuiin an TV en duh channel an hmet sawn chhen mai dawn a ni.

"Ka ngaihdan chuan British GP hi inelna pawimawh a ni a, mi zawng zawngin ngaihven se ka duh. Tun ṭumah hian kan ram tan thil hlu leh hriatreng tlak tih ka duh a, inelna lian dang a awm a nih chuan mipui ṭhenkhatin thil dang an ngaihtuah a ngai dawn," tiin car intlansiak aiin tennis leh cricket chuan ngaihven a hlawh zawk dawn niah a ngai.

F1 champion lai Hamilton hian an rama intlansiakah hian a zawnin vawi ruk hnehna a chang mek a, kuminah hian a chak leh a nih chuan Jim Clark leh Alain Prost te nena record inṭawm an neih lai khumin record thar a siam ang.

Season kal laiah Mer­cedes an cheṭha tluang a, intlansiak vawi kua an hmachhawn tawh zinga pariatah hnehna an chang. Tun ṭumah hian Hamilton chu rinkai ber ni chungin a inlan dawn a ni.