UK-ah Mizo nula

Commonwealth Judo Championship chu July 26-29 chhung hian Birmingham, United Kingdom-ah neih a ni dawn a, India aiawha inlan turin Mizo nula Lalnilawmawmi chu a feh chhuak.

Champhai nula Nilawmawmi hian India aiawh a feh chhuak tur hian open selection round hautak a paltlang. July 7-8 khan National Bal Bhawan, Delhi-ah ram aiawh tur thlanna hi neih a ni a, 44kg huanga inlan tur hian thlan a ni.

Junior national silver medal pakhat leh bronze medal pathum la tawh Lalnilawmawmi hian 2009 aṭang khan judo a luhchilh a, a inzir bul ṭanna chu SAI, Mission Vengthlang a ni. 2014 khan Patiala lamah a chhuk a, tun thlengin training hi a neih chhunzawm reng a ni.

Lalnilawmawmi chuan, "Kum 2016 tir lam khan ka dar veilam a hliam a, ka doctor rawn ten zai a ngaih tur thu min hrilh. Mahse, Pathian zarah zai ngai loin zawi zawin ka ṭha chho zel a, tunah chuan harsatna nei loin ka khel thei. Tun ṭumah pawh hian India tan medal lak ngei tumin ka bei ang," tiin Vanglaini a hrilh.