Bagan chelh mah se Hyderabad dinhmun a derthawng

Indian Super League semifinal khelh inbeisei Hyderabad-in a sang pali zinga tel turin an match tawp berah chak ngei ngei an mamawh ta - Thawhṭanni zan khan hmahruaitu ATK Mohun Bagan chu 2-2 in an inhnehtawkpui.

Hyderabad hian minute ngana lekah defender pawimawh Chinglensana Singh chu David Williams laka a foul avangin an chan nghal a, league hmahruaitu lakah Manuel Marquez naute hi chak tura beisei chi an ni lo. 

Mahse, Nizams-in (Hyderabad sawina) an hmaah playoff a inchhawp tih an hria a, Chinglensana hnawhchhuah a nih aṭanga minute thum hnu lawkah Bagan defender Pritam Kotal tihsual zarzoin Aridane Santana chuan goal hmahruai a khung - Bagan an hawihai. 

Bagan-in tam zawk an nih an chhawr thei lo reng a, minute 57-naah Williams pass fing tak dawngtu Manvir Singh chuan si phurh a sut hram - rin loh taka hmahruai nawntu erawh Hyderabad tho an ni a, Santana ball siamsak chu substitute Roland Alberg chuan minute 74-naah a khung.

Mahse, league hmahruaitu ni chunga season khar tum Bagan an beidawng duh bik lo. Hyderabad-in defensive game khel mah se hun pek belh minute thumnaah Pritam Kotal chuan a tihsual thup nan goal a rawn khung ve leh a, 2-2 in inkhel a tawp. 

Hyderabad hi league table-ah palina an ni mek a, an hmabak match hnihah NorthEast United an tlawm ve ve a ni loh chuan playoff khel tur chuan an match tawp bera FC Goa an hneh ngei ngei a ṭul tawh dawn. 

Highlander hian nizan khan East Bengal an hmachhawn a, he thu buatsaih a nih lai hian result kan hre hman lo.