Atalanta mualah team 'nem' Real Madrid

Zanin dar 1:30-ah Real Madrid chuan Champions League last 16 first leg khel turin Italian club ṭha Atalanta an lenchilh dawn a, an ṭhat dan bera an zin theih loh avangin an dinhmun a ṭha lo hle. 

Real Madrid hian La Liga-ah beisei phak lo mah se an elpui Barcelona chet chhiat zarah a sang zingah an la tel ve reng a, tun hnaiah Atletico Madrid an tawlh thluk bawk avangin champion beiseina an nei thar. 

Spanish football-a an boruak ṭha nen Real hian Italy an pan dawn a, chak loa haw an duh lo ang - mahse Serie A lama pangana ni mek Atalanta hneh hi a awlsam dawn lo. 

Italian club hian Real an mikhual hmaa an match hnuhnung berah Napoli chu 4-2 in an hneh a, an hneh tak Napoli hi team ṭha an nih avangin dah san loh an harsa. 

Tun season-a Real chungchanga khawthlang media-te titi ring ber chu Zinedine Zidane ban chungchang a ni a, French coach hi Madrid khaw club hian season tawpah ban an tum nia sawi thawm thlengin a awm mek. 

Mahse, Real hi tun hnaiah vannei takin an chak chho a, an khelh danah erawh lawmna tur a tlem hle - hei vang hian Zidane dinhmun a la him lo reng a, squad kim lo tak chunga Atalanta an hmachhawn hunah result a nei ṭha thei a nih chuan fak a hlawh ang. 

Real Madrid tan zanin inkhel tur hian danglamna tak pakhat a nei a, Champions League knockout stage-a match 100 an khelhna tur a ni. European club football inelna sang berah heti zat knockout match khel thei an la awm ngai lo. 

Spanish champion hian an tana zan pawimawhah chak loh an duh lo ang tih a chiang a, chutihrual chuan European champion ni ngun ber (13) team hi Champions League-a an match hnuhnung 10-ah vawi li chiah an chak a, rin ngam an harsa.

Zidane-a'n a player duh ber ber a hruai thei dawn lo a, Karim Bezmena, Sergio Ramos, Marcelo, Fede Valverde leh Eden Hazard-te chu hliam vangin Italy-ah an zin thei dawn lo vek. 

Hei vang tak hian Zidane tan hna a harsa dawn tih a chiang a, goal khung mawlh hi a harsa dawn - Atalanta hmachhawn tur Real squad pumpuiin tun season-a goal an khung tawh zat belhkhawm chu goal 23 a ni!

Real squad zin chhuak zinga goal khung hnem ber chu Casemiro a ni a, Brazilian midfielder hian tun season-ah goal ruk a khung tawh - Real forward hruai zingah goal thum khungtu Vinicius Junior chu a khung hnem ber a ni mek. 

Madrid first team aṭangin player pakua ngawt an zin thei dawn lo a, academy lam aṭangin player paruk an awm thung - beisei tih san viau a harsa rih hle. 

Serie A en ṭhin chuan Atalanta hmuhnawmzia an hai lo a, attacking football hmuhnawm pho chhuak ṭhin team hian Real squad ṭha ber an hmachhawn dawn lo tih an inhriat dawn avangin an nawr na leh sawt ang - Spain-a second leg khelh hmaa quarterfinal lut tur chinfel lawk hi an duh hial ang. 

Atalanta hian tun season Serie A-ah goal 53 zet an khung tawh a, goal khung hnem lama an phak loh awmchhun hi hmahruaitu Inter Milan (57 goals) chiah an ni a, an hmachhawn tur Real ang lo takin goal khung lamah harsatna an nei lo hle. 

Italian club tan Colombian attacking duo, Luis Muriel leh Duvan Zapata bawk hi innghahna an ni leh dawn - kum 29 mi Muriel hian tun season inelna hrang hrangah goal 17-a khung tawh a, Zapata hian goal 13-a khung tawh thung. 

Italy-a Real defender zinte hi Raphael Varane, Nacho Fernandez, Ferland Mendy, Victor Chust leh Miguel Gutierrez an ni a, Atalanta tlarhma nawr natzia ngaihtuah chuan Real fans tan ngaihngam taka inkhel en a harsa ang. 

Real hi Spanish Super Cup semifinal aṭangin Athletic Bilbao chuan an pet chhuak a, a hnu lawkah Copa del Rey round of 32 aṭangin fourth division club Alcoyano-in an pet chhuak leh zui!

Mahse, Real an insiamṭha vat a, hemi hnua an league match hnuhnung parukah vawi khat an tlawm tih loh chu an chak vek a, he result duhawm hi chhawm nun hram hram ang tum ang. 

Dinhmun duhawm lo tak aṭanga vawi tam a team lo khai chhuak tawhtu Zidane chuan, "Hei hi kan team neih chu a ni a, hnehna chang turin ṭha takin kan inbuatsaih ang," a ti a, squad kim lo mah se point thum aia tlema lungawi a tum lo. 

Atalanta hi inelna hrang hranga an match hnuhnung 20-ah vawi khat chiah an tlawm! Vawi sarih an khingpui an inhnehtawkpui a, vawi 12 an chak - an hneh zingah Ajax, Napoli leh AC Milan an tel a, Juventus an draw bawk. He team hi an chhe lo tih hrilh nawn kan ngai lo - zaninah inkhel hmuhnawm en tur a awm dawn e.