Ronaldo hoin Juve an zuang sang

Juventus chuan Cristiano Ronaldo ropuina hmangin Crotone 3-0 in an hneh a, Italian champion hian Serie A nomawi an kawl lai hloh mai an tum lo; a zawna a vawi 10 nan champion ngei an tum tih an lantir.

Old Lady tan Ronaldo-a'n chawlhlawk hmain goal hnih a khung a, second half-ah Weston McKennie chuan khung belhin nuamsa takin hnehna an chang, hmahruaitu Inter Milan nen an inkarah point riat a awm, match khatin an khel tlem thung.

Thawhṭan zan Allianz Stadium a inkhelah Crotone an hlauhawm hmasa, defender Danilo a tluk avangin Arkadiusz Reca chuan hun ṭha a hmu, mahse goal ban hrulah a pet chhuak - table mawngphah team hian remchang dang an hmu chhunzawm tawh meuh lo.

Matthijs de Ligt-a'n goal ban hrula a pet bakah Aaron Ramsey chuan bar a tuh per dawp. Ronaldo erawh dan reng theih a ni lo, minute 38-naah Real Madrid forward hlui hian chiang takin goal hmahruai a tauh lut.

Chawlhlawk hma deuhin Portuguese forward hian hla deuh tak aṭangin a 'shot' pawp, keeper Alex Cordaz-a'n lo dansak mah se ball per hi Ramsey chuan a la hman, box laiah cross lut zuiin ball kanga hlauhawm Ronaldo-a'n chiang tak bawkin a tauh goal.

Ronaldo-a'n hattrick siam theihna hun nei mah se goal ruak a khung ṭhelh a, keeper Cordaz a paltlang thei tawh lo bawk. Buai nuaih karah McKennie chuan goal thumna a khung a, goal dang lut zui loin an mualah Andrea Pirlo naute nuamsa takin an chak.

Team enkawl kawnga tawnhriat nei lo chungin Juventus-in Pirlo an 'risk' a, chet fuh leh fuh tawk loh ni an nei fo. Tun hnaiah Juve inkhel a hmuhnawm leh tawh, manager pawhin beiseina a nei sang leh tawh hle.

Pirlo chuan, "Inkhel tir lamah khan kan hlauthawng hman deuh, a hnu lam erawh hneh takin kan thunun thei. Ball pek sual leh intlanthelh fuh tawk lo deuh lai nei mah ila kan insiamṭha thei kha a lawmawm hle a ni.

"Player zawng zawng ṭha taka khel vek turin ka duh. Alvaro Morata pawhin ngai a awh ve leh ṭep tawh, hmun hran hrana khel thei Dejan Kulusevski pawimawhna kan hmu. Ramsey pawh kan tan mi pawimawh a nih zia a lang leh bawk," a ti.

Italian manager hian Ronaldo chu team khaipa leh innghahna a nih thu a pawm thlap a, chutih rualin Serie A mai bakah Champions League thlenga hlawhtlin an duh a nih chuan player dang zawng zawng pawhin ṭha taka an khelh a pawimawh dawn.