Murray rilru a hrehawm

Andy Murray chuan Australian Open a khel thei lo kha hrehawm a ti hle a, beiseina sang tak nen a lo thlir tournament a khelh theih loh avangin TV lamah pawh a en zui duh lo tih a sawi chhuak.

Britain tlangval hian Melbourne Park-ah inkhelh ngei a duh, mahse Australia sorkar lamin hrileng vangin inelna hmachhawn turte chu ni 14 tal khung hran a duh, hun tepter taka coronavirus kaitu Murray tan kawng a inhawng ve ta lo a ni.

World number 1 hlui Murray chuan, "En lo tawp chu ka ni lo, mahse ka en tlem hle. Hreh tak chunga khelh theih loh kha a hrehawm hle a ni, social media lama ka ṭhiante pawh ka 'follow' duh lo hial, a chhan chu a boruak kha tawn ve ka duh lo," a ti.

Australian Open final-ah khan Novak Djokovic chuan Daniil Medvedev hnehin nomawi a chawi a, Grand Slam title 18 a lak tlinna chiah a ni. Major title lak hnem lamah vawi 20 champion tawh Roger Federer leh Rafael Nadal te chauh a tluk lo.

Murray chuan, "Player naupang zawkte ṭha tak takin an rawn khel chho hmuh hian min ti lawm ṭhin. Chutih rualin inelna lianah chuan a boruak hi a danglam thei hle, a bik takin Medvedev tan pawh grand slam title tam tak la tawh nena inhmachhawn kha chu a harsa ve hle ang," a ti.

Season hmasa khan Dominic Thiem-a'n US Open nomawi a la, player chhuak thar zingah Austrian star bak hi Grand Slam title la thei an awm meuh lo. Federer, Nadal leh Djokovic ten an insem zo mai zel, kuminah pawh thawnthu a la danglam vak dawn lo niin a lang.