Gopi nen inrem lohna kan nei lo - Sindhu

PV Sindhu chuan Gachibowli Stadium-ah training a nei dawn a, a inzirna hmun a sawn avang hian India chief coach Pullela Gopichand nen buaina an neih chuan loh thu a sawi.

Badminton Assciation of India (BAI) chuan Tokyo Olympic khel turte chu Gopichand Academy-ah training a neih tir a, ram tan hlawhtlinna an chan theih nan enkawlna ṭha an pek thei ang zawng zawng an chhawpsak.

Mahse, Rio Olympic silver medalist Sindhu erawhin kalhran a duh, Korean coach Park Tae Sang kaihhruaina hnuaiah hmun hrana training neih a duh zawk - Britain ramah pawh thla khat chhung training a lo nei tawh bawk.

Kum 25 mi Sindhu chuan, "BAI leh Sports Authority of India (SAI) hnenah ka dil a, anni chuan Gachibowli Stadium lama training min phalsak. Ka training-na tur hmun in international standard a ni - Olympic khelhna tur hmun nen angkhat a nih avangin ka thlang.

"Media ṭhenkhatin Gopi nen kan inkarah khi awm anga lo sawi tawk an awm fo, keini pahnih chuan India tana ṭha ber tura kan hriat angin thutlukna kan siam mai zawk a ni. A nihna takah chuan Gachibowli Stadium kan hman theih nan hian Gopi-a'n hma min laksak," a ti.

Sindhu hian Olympic silver medal a lak hnuah world champion a ni leh thei a, infiamna khawmpui lian Tokyo Olympic champion ni turin theihna a nei sang tawk tih a chiang, tun hnaiah erawh a result a ṭha lo. Hmasawn turin boruak hran tem a duh niin a lang.