Timberwolves coach thar Finch

NBA team Minnesota Timberwolves chuan an coach Ryan Saunders an ban hnuah coach thar an nei, dinhmun hniam taka an awmna hruai chhuak thei tura an beisei Chris Finch an lalut.

Saunders kaihhruaina hnuaiah Timberwolves hian beisei an phak lo. Thawhṭan zing khan New York Knicks lakah 103-99 in an chak lo, tun hnai an match hnuhnung pakuah vawi riat ngawt an tlawm, coach hi an ban zui nghal.

Kum 51 mi Finch hian English team Sheffield Sharks a enkawl tawh a, 2012 London Olympic-ah khan an ram team a lo kaihruai tawh bawk. Timberwolves chuan an coach thar lakah beisei an neih san thu an sawi.

NBA regular season kal laiah Timberwolves hi vawi sarih chauh an la chak, ṭum 24 zet an tlawm tawh thung. Western Conference table mawngphah team hian tukin dar 6:30 hian Milwaukee Bucks an hmachhawn ang.