Champions League khelh tum inum boruak sang Man United an vannei, Wolves-in Spurs hneh

Premier League-ah Champions League khelh tum inum boruak a sang a, Manchester United-in Chelsea nen an inkar tihzimna hun ṭha bawhpelhin Goodison Park-ah Everton an draw hram. 

Inkhel dangah Wolverhampton Wanderers-in Tottenham Hotspur chu 3-2 in an hneh a, Pathianni zan inkhel result hian Europe inelna sang ber khelh tuma inum chanchin a ti ngaihnawm sawt.

Goodsion Park-ah Dominic Calvert-Lewin-a'n minute thumna lekah Everton tan a khung a, United lakluh thar Bruno Fernandes-a'n minute 31-naah siphurh sutna goal a khung. Injury time-a Calvert-Lewin-a goal khung an pawm lo a, Toffees boss Carlo Ancelotti hnawhchhuah a nih bakah VAR thutluknain sawisel a hlawh hle.

Manchester United-in Europa League last 16 lut turin Club Brugge 5-0 in an hneh a, an phur vanglai tak ni mah se Goodison Park-ah David de Gea chetsual vangin minute thumna lekah goal an chhuah nghal. Spanish keeper ball petchhuah chu Calvert-Lewin-a'n dang hmanin a per chu goal-ah a lut a, Everton an phur ta zawk.

Calvert-Lewin-a'n United offside trap a bum hnuah ṭha zetin goal-ah pet mah se De Gea-a'n ṭha takin a dang. United-in Everton tlarhnung rum ṭhaih vein Nemanja Matic-a ball petin crossbar a per a, minute 31-naah Bruno Fernandes-a'n kawh zetin yard 20 aṭangin a khung a, first half-ah 1-1 a ni.

Second half-ah inkhel a nung a, Gylfi Sigurdsson-a'n freekick aṭangin goal ban pet perin mikhual team an him hlauh. United tan Bruno Fernandes bawk a rawn inlar a, Everton keeper Pickford-a'n ṭha takin a dang a, hemi per Odion Ighalo khung tur pawh England keeper hian a dang leh bawk. 

A tawpah sawizui hat tur thil a thleng. Injury time-ah De Gea-a'n Sigurdsson-a goal khung tur a dan hnuah a per chu Calvert-Lewin-a zawnah tla fuhin tun laia forward goal khung thei ber zinga mi English forward hian goal-ah pet lehin Harry Maguire-a ke a per hnuah goal-ah a lir lut. 

Everton chakah an inngai a, referee Chris Kavanagh pawhin goal-ah pawm zet mah se VAR a inrawlh. Amaherawhchu offside position-a Sigurdsson a awm avangin goal-ah pawm a ni lo a, Everton manager Ancelotti erawh goal luh danah Sigurdsson a inrawlh loh avangin goal-a pawm turah a ngai thung. Italian manager hian a sawisel nasa deuh a, referee-in a hnawt chhuak.

Everton manager Carlo Ancelotti chuan, "Red card min pek dan kha ka hrethiam lo. Min pek chhanah khan sawifiahna ka phut a, kan inbiakna erawh sawi vek a rem lo. Kan tan chuan thutlukna kha hriatthiam a har a, Sigurdsson khan De Gea thil hmuh a hliah lo," tiin a sawi.

Everton hian March 8, Pathianni zan hian Chelsea hmachhawn turin Stamford Bridge an tlawh ang. Ancelotti chuan, "Min hnawhchhuah vang hian Chelsea nena kan inkhelh huna min hrem chuan ka lawm lo khawp ang," tiin referee thutlukna sut a beisei thu a sawi.

United manager Ole Gunnar Solskjaer chuan, "Ball pet chhuak tura hun kan duh rei a nih chuan thil thleng thei a ni a, Calvert-Lewin hian ball a zawng nasa ṭhin. Kan goal-a ball per a lut kha kan vanduai a ni. Bruno Fernandes hi ka mamawh tak player a ni a, a hnathawhah kan lawm hle a ni," tiin De Gea tihsual a sawi a, player thar Portuguese midfielder a fak bawk.

Wolverhampton Wanderers-in Europa League last 16 an lut a, an vanneih vang a ni lo tih lantir nan Pathianni zan khan khualmualah Tottenham 3-2 in an hneh. Spurs hian Steven Bergwijn leh Serge Aurier te hmangin ṭum hnih hma hruai mah se Wolves-in Matt Doherty leh Diogo Jota te hmangin an sut ve ve a, minute 73-naah Raul Jimenez-a'n chakna goal a khung.

Wolves manager Nuno Espirito Santo hi a inkhelh hun laiin goalkeeper a ni a, Jose Mourinho hnuaiah khel tawhin FC Porto-in 2003-04 a Champion nomawi an chawi khan second keeper a ni. Nuno Espirito Santo chuan, "Mourinho hote kan hneh avangin ka tan chuan a danglam phah lo a, inkhelh harsa takah kan chak hram. Jose Mourinho hi ka dahsang em em a, min zirtirtu a ni," tiin a sawi.

Spurs manager Jose Mourinho chuan, "Chak kan phu a, kan chak ta lo kha kan vanduai. Kan rilru put hmang dik loh vangin kan chak lo. Wolves hi counter attack-ah an ṭhat avangin kan fimkhur a ṭul a, beiseina kan siam thiang lo," tiin an vanduai thu a sawi.

Point dinhmun aṭanga thlir chuan Liverpool leh Manchester City (hrem an tawh loh chuan) ten season tharah Champions League an khel ngei dawn niin a lang a, Leicester City erawh an insiam ṭha vat a nih loh chuan an dinhmun a la him lo.

Premier League-ah match 10 chiah khelh tur a awm tawh a, heti chung hian Champions League khel thei team an la tam hle. Palina Chelsea-in point 45 an hmu a, 11-na Everton-in point 37 hmuin an inkarah point riat chiah a awm. Premier League-ah champion tur a chian ti tih tawh avangin UCL khel tura inum hi league ti ngaihnawmtu tur a ni.