Republic Veng Vs Armed Veng

Suzuki Gixxer SF 250 20th Inter Branch YMA Football Tournament quarterfinal chu vawiin aṭangin khelh ṭan a ni dawn. Tlai dar 2:00-ah kumin NECS Cup final-a inhmachhawn Republic Veng leh Armed Veng te an inkhel ang a, hemi hma hian Aizawl khaw pawn aṭanga la dam awmchhun Hnahthial Joint leh Salem Veng te an inhmachhawn ang.

Tun hnaia Lammual inkhel entu tam ber ṭum chu March 29-a Republic Veng leh Armed Veng inkhel kha a ni a, kawr rawng sen leh eng khatin khelmualah an pungkhawm. CYMA Football-a team ṭha pahnih intawn hun hi quarterfinal la ni chauh mah se entu an tam dawn a, ruah a sur emaw sur lo pawh ni se inkhel hmuhnawm chhawp chhuak ngei tura ngaih a ni.

Hnahthial hi Wai Wai Cup Inter Constituency 2007-ah khan an cham­pion tawh a, tun ṭumah pawh hian team ṭha Venghlui leh Lengpui te an hneh tawh avangin champion tura rinkai zingah an tel tawh. ISL player captain Isaac Vanmalsawma leh Jakob Vanlalhlimpuia te hi an khelh ṭhat niah chuan team chakpui thei ve ve an ni.

An khingpui tur Salem Veng buk rit lo hret mah se an starting eleven thlir chuan hawi hniam tur an ni bik lo. MPL-a hming langsar David Lalchhuanawma leh Lalthantluanga te an kawl ve tlat. Hnahthial manager C. Lalramdin­sanga (RD-a) chuan, "MPL awm hnu chuan team angin thingtlang tan a harsa a, Aizawl khaw pawn aṭanga quarterfinal kan lut thei hi kan lawm. Kan player-te hi phaia khel mek te, academy-a awm te, Aizawl leh hmun danga inkhel tura kal chhuak te an nih avangin grass-ah an buai tawh lo. Tlarhnungah veteran player R. Vanlalpeka'n min ho tawh dawn a, tlarhnung pawh kan phui sawt ang," tiin Vanglaini a hrilh.

Lawmthu sawi chhunzawmin RD-a chuan, "Harsa taka bul ṭan kha quarterfinal kan han thlen meuh chuan ṭanpuitu hi an lo lang zut zut mai a, kan lawm takzet a ni. Kan thlenna Republic Veng chungah lawmthu sawisen loh kan nei chhunzawm zel, thingtlang team kan ni a, fans lamah ṭan min lakpui nasa a, Lammual-ah kan fan-te au ri a nep bik lo. Kan bialtu MLA Dr R. Lalthangliana chungah kan lawm a, Hnahthial Welfare leh Hnahthial lama min lo ngaihsaktu leh ṭanpuina min petu zawng zawng chungah lawmthu kan sawi tak meuh a ni," a ti.

Venghnuai FC coach Lalrindika Hmar chuan, "Hnahthial Joint hi team ṭha tak an ni a, ISL pawha player langsar pawl kawl thei an nih avangin keini aiin an squad a chhah. Zoram mipui hian inchawina siam ta se, Hnahthial lama dahtu an nih deuh vek ka ring. Mahse, Hnahthial team hneh tur hian kan naute aia ṭha an awm bik lo a, kan ring tawk a, hneh ngei pawh kan tum dawn. A tawpah Pathian vang liau liaua a hlim zawk kan nih ngei ka beisei,” tiin Vanglaini a hrilh.

Tualchhung football ngainatu tam takin an en châk NECS Cup final rematch hi Armed Veng leh Republic Venga chengte tan phei chuan hmaih phal loh tur a ni. An intawn hnuhnun berah tun ṭuma Republic Veng captain F. Lalrinpuia (Valpuia) hnawhchhuah a nichungin minute 90 chhung goal a lut lo a, extra time-ah Armed Vengin Lalmuanzova goal hmangin hnehna an chang.

NECS Cup final hi Valpuia an hnawh­chhuah vanga thutluk­na siam hun chhung rei tak leh floodlight ti eng tura hun an mamawh avangin inkhelh hun­chhung hi darkar li zet tling. An intawn hnuhnun ṭum aiin an ṭha zawk ve ve a, team riat la dam zingah Armed Veng leh Republic Veng te chiah hi champion tawh an ni.

Armed Veng hian tun round lut tur hian team ṭha College Veng an hneh tawh a, Republic Veng hian goal la chhuah loin goal 18 an khung a, team ṭha anni tih an lantir bawk. Armed Veng coach Lalbiaksanga Colney chuan, "NECS Cup Final-ah a vannei zawkah kan ṭanga tun ṭum chu quarterfinal-ah kan insu dawn. Tun ṭum inelnaah chuan Republic Veng hi team ṭha ber pawl an nih ka ring. Mahse game a nia a vannei zawk zawk a ni mai. Kan veng mipui support-na kan mamawh khawp maia a tam thei ang ber a hmuna min lo ṭawiawm turin ka sawm tak meuh meuh a ni," tiin Vanglaini a hrilh.

Republic Veng coach PC Lal­nun­siama chuan, "Champion tumin theih­tawp kan chhuah a, kan player-te kan ringtawk bawk. Player leh coaching staff-te kan thawhhona a ṭha­in kan inlungrual a, Armed Veng hmachhawn turin hi kan inpeih tawh. Pathian zarah chak ngei kan inbeisei a, vengchhung mipuite min support-naah lawmthu kan sawi a, veng tan theihtawp kan chhuah ang," tiin an inpeih tawh thu a sawi.