Barcelona player thar Griezmann

Buaina leh sawi neuh neuh karah Barcelona chuan hun rei tak rima an lo hel tawh Antoine Griezmann an chhai thlu ta a, Atletico Madrid aṭangin pound maktaduai 107-in an lalut. 

Kum 28 mi forward hian Nou Camp-ah kum nga cham turin contract a ziak a, release clause pound maktaduai 717 a ziak tel bawk. French forward hi khawvela player manto parukna a ni ta a; Neymar, Kylian Mbappe, Philippe Coutinho, Joao Felix leh Ousmane Dembele te chu a chunga awm an ni. 

Barcelona chuan thuchhuah siamin, "Nou Camp-a rawn pan tak avangin French forward hian khawvela player ṭha ber zinga mi a nihna nemnghet turin pen khat a rawn pen leh ta a ni," an ti. 

Atletico hian Barcelona chu a ruka an player dawrah an puh a, an indawr ṭan aṭanga chhiar tur a nih chuan Griezmann-a man hi pound maktaduai 179-a  nih tur thu an sawi. Release clause hi player leh club inremna angin a tlahniam ve leh ṭhin a, July 1 khan pound maktaduai 179 aṭang hian pound maktaduai 107-ah hian a tla hman. 

Chumi awmzia chu Bar­celona-in Griezmann dawr ru a, inremna an neihpui kha chuan French forward hi pound maktaduai 179 man a ni a, mahse Barca hian a tlawm hun nghakin July-ah an lei ta chat tihna ni. Atletico chuan, "Griez­mann-a man a tlakhniam hma khan player leh Barca hi an lo inrem tawh ngei a, chuvangin Barca-in pawisa min pek zat hi a dik lo a ni," an ti. 

Kum 28 mi Griezmann hian a club hmasa ber Real Sociedad aṭangin Atletico hi 2014 khan a zawm a, Madrid khaw club tan hian Europa League, Spanish Super Cup leh UEFA Super Cup nomawi a chawi hman. 

Atletico-a season nga hun a hman chhung hian club top scorer a ni vek a, match 256-a khelh sakah goal 133 a khung a, 2015-16 khan Atletico-a a mimal season ṭha ber a hmang a, match 54-ah goal 32 a khung. Euro 2016-ah khan France tan inlanin final an lut a, best player-ah thlan a ni. Ballon d'Or top three-ah a lang a, mahse Lionel Messi leh  Cristiano Ronaldo a tluk lo. 

Griezmann hian World Cup 2018-ah France a champion pui a, Ballon d'Or-ah pathumna dinhmun bawk a luah nawn - Barca aṭangin dawhsan sang bera din a beisei ang. 

Spanish champion Barca hian Griezmann an lakluh hma­in player liantham pathum ngawt an lo lalut tawh a, midfielder Frenkie de Jong (Ajax), goalkeeper Neto (Valencia) leh defender Emerson (Atletico-MG) te lakluh nan pound maktaduai 199.7 an lo seng tawh. 

Barcelona hi an player hlui  Paris St-Germain forward Neymar nen sawi zawm an la ni cheu a, tlarhmaah Messi, Luis Suarez, Dembele leh Coutinho an nei bawk.