Tennis league atan player lilam Player manto ber Innocent

Tualchhung tennis inelna lian leh ngaihhlut 2nd Aijal Club Challenger Tennis League khel tur Mizo player lilamna chu Inrinni zan khan neih a ni a, Rs 1,11,000 man Innocent Lalrindika chu player manto ber a ni. Mizoram number 3 leh Mizoram Open champion lai Innocent hi champion lai Zarkawt Xennons tan a khel ang.

Mizoram number 1 Lalhma­chhuana chu team thar Chanmari Slammers tan a khel dawn a, Lalzuia Open champion Basil L Khuma chu K-12 Tennis Academy tan a khel thung ang. Lalzuia Open bakah tualchhung inelna hrang hranga champion tawh Ramengmawia chu eizawnna vangin tun hnaiah inkhel tam lo mah se a rawn kir dawn a, ani hi an khua Ngopa Warriors tan a inlan dawn a ni.

Aijal Club Challenger Tennis League hi December 6-14 chhunga khelh a ni dawn a, team tinah player 10 zel an awm ang. Team panga hian tualchhung player pali tal an neih a ngai dawn, state pawn player lak theih a nih dawn avangin India player ṭha kan hmuh leh ngei a rinawm.

Inelnaah hian team zawng zawng an inkhel kual dawn a, game an lak zawng zawng belhkhawm a nih hnuah a sang pahnihin final an khel ang - match tin a pawimawh vek dawn tihna a ni. Senior bakah kum 16 hnuai lam inelna buatsaih a ni bawk ang.