Federer hnehin Djokovic a champion

Tennis inelna upa ber leh ngaihhlut hlawh Wimbledon 2019 chu nizan khan a hmawr bawkna neih a ni a, world number 1 leh seeded pakhatna ni bawk Novak Djokovic chuan vawi riat champion tawh Roger Federer chu 7-6 (7-5), 1-6, 7-6 (7-4), 4-6, 12-12 (7-3) a hnehin a vawi nga nan a champion.

England-a tennis court ṭha ber Centre Court-a final entu ten darkar li leh minute 55 chhung inkhel kha rei an ti lo a, khawvela tennis khelh a nih chhung chuan kumin Wimbledon mipa singles final hi hriatreng a ni tawh ang. Player ropui pahnih hi vawi 48 an intawnna chiah a ni a, record nei ṭha zawk Djokovic hian 26-22 in hma a hruai. Inelna lian Grand Slam bikah pawh Serbian tlangval hian 10-6 in dinhmun ṭha zawk a luah.

Centre Court-ah nidang ang bawkin Federer chu mipui lawm hlawh zawk a ni a, court chhunga a rawn luh lai aṭangin thawm a ṭha. Swiss star hian service hmasa zawkin, a ball vuak hmasa ber chu aces atana chantirin bul 

ṭanna duhawm a ni.

Service an hloh duh lo a, set hmasa ber hi minute 58 chhung zet an khelh hnuah tie break hmangin Djokovic a chungnung. Set hnihnaah erawh Serbian tlangvalin a service hmasa pahnih a hloh avangin a thochhuak zui lo.

Final thleng turin Federer-a'n court chhungah darkar 12 leh minute 25 hun a hmang a, semifinal thlenga Djokovic inkhelh hun belhkhawm erawh darkar 13 leh minute li a ni thung. Hun hmang hnem zawk mah se Novak hi kum naupang zawk a nih avangin inkhelh rei a 'cho' tih a lang a, rally rei tak tak neih a hreh lo.

Set hnuhnung berah an inkhel tawk viau a, game hnih ve ve an lak hnuah Djokovic-a'n break point a hmu, tawnhriat ngah Federer rawn tlan hmain vanneihna zawng mah se champion lai Novak chuan na zeta backhand letin a vaw dik a, hun pawimawh vawrtawpah service a chhuhsak.

Djokovic-a'n a service vawi hnih hum zawn thei ni se Wimbledon champion a ni tlang nghal mai tur. Mahse, Swiss star Federer-a'n a chhuhsak let a, final boruak thi mai tur chu a aia nasa zual zawkin a chhem nung!

Set hnuhnung berah Federer-a'n break point hmang ṭangkaiin 8-7 in hma a hruai a, 'serving for the championship' niin championship point a neih hmasak chu a hloh. Game 12 ve ve thleng an lak avangin dan thar hmanga tie break khelh a ni. Tie break hmasa lama vawi hnih vannei tawh Djokovic bawk a vannei.

Tennis player zingah Federer, Rafael Nadal leh Rod Laver ten kum 30 an tlin hnuah Grand Slam nomawi vawi thum an chawi tling thei a, tunah chuan kum 32 mi Djokovic chu an huangah a tel ta chiah. Kum 37 leh ni 340 mi Federer erawh Open Era china major title la thei upa ber nih a tumna chu a thlawn ta rih a ni.

Grand Slam chawi hnem lamah Federer (20 titles) leh Nadal (18) te chauh hi Djokovic-a'n a tluk lohte an ni ta a, tunah nomawi 16 a neih ta - a kum a naupan ber bawk avangin player ropui pathum zingah ropui ber nih theihna hun ṭha a nei chho ang.