Halep tan Wimbledon Title

Simona Halep chuan amah sawisel ṭhintute ka hup nan Wimbledon title a la ta. Romanian nula zinga grass court inelna lian champion hmasa ber hian final-a a hneh hi Serena Williams a nih avangin a sulhnu hi sawi nep theih a ni tawh ngai lo ang.

Inrinni zan Centre Court-a final inkhelah Halep hian minute 56 chung lekin 6-2, 6-2 in hnehna a chang a, hnehna changa nomawi a chawi hnuah Halep hian tennis a khelh hun chhunga a khelh ṭhat ber ṭum a nih thu a sawi.

Wimbledon vawi sarih champion tawh Serena-i'n a service ṭha leh ball vuak na tak hmangin bei ṭhin mah se Halep a buai phah lo, seeded pasarihna hian a duhna hmunah tak a vaw let thei zel. Vawi thum chauh unforced error a nei, mahni tihsual vanga khingpuite point pe tlem Wimbledon final record thar a ni nghal.

Kum 27 mi Halep chuan, "Ka khelh ṭhat ber ṭum a ni. Ball ka hmachhawn apiangah 100% rilru ka pek a ngai tih ka chiang a, player tharum ngah leh tawnhriat nei hnem lakah hetianga ka khel chhuak thei hi awih a har zawk hial," tiin a sawi.

Grand Slam a champion hmain Halep hi hun rei tak chhung world number 1 a ni thei, chutihlai chuan 'Player ṭha tawk lo' tiin sawisel a hlawh hle. Mahse, season hmasa khan French Open nomawi a chawi a, tunah Wimbledon champion a nih leh tak avangin a ṭhatna sawi nep theih a ni tawh lo.

Grand Slam nomawi chawi hnem ber Margaret Court (24 titles) nih rual turin Serena tan nomawi pakhat bak a ngai tawh lo. American nula Serena hian Australian legend tluk theihna hun ṭha vawi thum a nei tawh. Mahse, Wimbledon final vawi hnih leh US Open-ah a chak lo zawkah a ṭang vek.

Kum 37 mi Serena chuan, "Halep khan a rilrua a duhthusam angin a khel chhuak a ni, khatianga khel zawk khan hnehna an chang ṭhin. Record hi ka inkhelh chhan ber a ni lo a, ṭha taka ka khel ve leh a nih chuan lawmman dang hi chuan min la rawn zui ve leh mai ang," a ti.

Tun hma angin Serena hian thahrui a ngah tawk tawh lo tih a hriat, a vanglai khan Grand Slam malah singles bakah doubles pawh a khel kawp thei. Tun ṭumah hian singles a khelh bakah Andy Murray nen mixed doubles a khel - a tir lamah khel tluang viau mah se inelna a rei hnuah a taksa a chau tih a hriat.