Mizoramah Santosh Trophy Sports Minister leh MFA-in an sawiho

India rama state leh state football inelna sang ber National Football Championship for Santosh Trophy final round chu April 14-27, 2020 chhung hian Mizoramin a thleng dawn.

Hemi chungchangah hian nimin khan Mizoram Football Association hruaitute chuan Sports minister Robert Romawia Royte hmuin Santosh Trophy ṭha taka thlen dan tur an sawiho. Sports minister chuan Santosh Trophy chu kumin hi a pawimawh bik thu sawiin, "Mizoramin kan thleng tur hi a lawmawm a, a chhan chu National Games-a khel phak tur zawnna a ni nghal dawn a, kan qualify theihna turin theihtawp chhuaha ṭan lak a ngai a ni," a ti a; Santosh Trophy-ah team 10 an tel dawn a, sports tourism ṭha tak a nih nghal tur thu leh, players bakah team official, match official leh journalist-te lo kalin Mizoram pho chhuahna hun remchang a nih nghal thu a sawi.

MFA lam pawhin Santosh Trophy chu India hmar chhakin an thlen zen zen ngai loh thu leh, AIFF-in a thlengtu tura Mizoram a thlang chu lawmawm an tih thu an sawi rualin, kawng engkimah Sports Minister puihna leh fin chhuahna an mamawh thu an sawi. Santosh Trophy-ah hian Mizoram bakah West Bengal, Goa, Punjab, Kerala, Services, Delhi, Jharkhand, Meghalaya leh Karnataka-te final round khel turin an tling a; Mizoram team hian Lammual leh Rajiv Gandhi Stadium lamah ngawrh takin training an nei mek a ni.