Khuanu duan lawk final

Sawi tur ka vai. Kan vannei a, Kiwis ho an vanduai a ni ber. Thil thlen dan kha keimahni tana khuanu lo duan lawk a ni ber e - Joe Root

Inkhel ṭum 48 ngawt leh hapta ruk a liam hnuah a hmawr bawk a ni ta. World champion hre turin super over pawh a tawk zo lo ang a, final-a four vaw hnem zawk zawkin nomawi an chawi dawn tih hi tuin nge hmu lawk ang le...

Pathianni zan Lords khelmualah khan kum tam tak liam ta a, a drama ziah hmanga he London khawpui lo sawi nghing ṭhin William Shakesphere a ziah tluk zeta ril leh ngaihnawm, infiamna khawvel drama kan hmu ngei e.

St Johns Wood hmuna Lords Cricket Ground-ah World Cup final an khelh mek laiin an piah lawk mel sawm leka hla, motor-a darkar chanve tlan lek Wimbledon Venga, All England Tennis Club hmunah Lawn  Tennis chanchin a hming dai tawh ngai lo tur pahnih Roger Federer leh Novak Djokovic ten final ropui an khel mek bawk. Mit tleina tur a va tam em.

Lord's curator Karl Mc Dermot-a'n tun World Cup-ah pitch sawisel a awm zeuh zeuh tih hre rengin, final atan bowler leh batsman te tana inangkhat vek turin pitch-ah hnim ṭhahnem tak ṭo chu a tan kawlh duh lo. London khaw dur hnuaia ṭhumvawrah captain pahnih tan duhthlan tur hriatthiam a harsa ngei ang. Kane Williamson-a'n England lam pacer panga khel turte hre ran chunga chawhma boruaka an ball vawm hmachhawn chu a hlauhawm dawn tih hre mah se final a nih avangin khatiang ang pitch-ah chuan run 250 vel siam chu champion-na tur total ṭha a ni tih hre ranin, amah leh a batsman-te a ring ngam.

Rin lawk ang ngeiin, ball a swing nasa a, batting a awlai lo tih a hmuh theih. New Zealand lamah khel ṭha lawr an awm lo a, ball hnuhnung ber Mitchell Santner-a'n vuak tum loin a lo chhuah mawl ringawt kha a tawpah an ram ropui luh lohna chhan pakhat chu a ni ta ngei e.

English bowler ho ball vawm swing dan hmuhin, Trent Boult leh a ṭhiante pawh an awm mai mai dawn lo tih a hriat. Swing leh seam bowling ropui kan hmu ta ngei a. Kookaburra ball varin batsman ropui Joe Root a hre lo a, Jason Roy a hlauhawmzia a hai tlat. English batsman tan ball vuak aiin damkhawchhuah tumna a ni mah tawh.

Kane Williamson-a'n starting 11-ah duhthlan tur a nei vak lo. Bit and Piece all rounder James Neesham, Colin de Grandhomme leh Santner-ten an phak tawkah cheng zathum ṭheuh hlawh chhuak dawn lo mah se cheng za ṭheuh an thawhkhawm chuan an tlin ve thei tho tih hrechungin a hmanna tur tawk a thiam.

England captain Eoin Morgan erawh tun WC team zawng zawnga duhthlan tur nei ṭha ber a ni. Morgan hian final-a ball swing nasatna pitch a bowler panga khelh tir a, genuine all rounder Ben Stokes a bowling chhawr mang hlei loin batting line up a ti thui duh lo kha a tisual teuh hle chu a ni.

Ṭhanghnih liam dawn zet tawha high sikul kan luh laia 'Imitating an English Gentleman' tih kan zir ṭhin chang chawiin, super over hmanga England world champion an nihna chu Martin Guptill a ball theh, mak tak maia Ben Stokes-a bat a per hnuah ball sawt kawiin four ta daih kha a ni ngei ang.

Khatiang ball mihring per kha a tlana tlanchhuah tur ni se, gentlemen's game cricket-ah tumah an tlan lui ngai lo. Mahse a ball ngeiin amahin boundary a pan tak nawlh siah chuan, dan hmangin four a ni lawi si. Ben Stokes pawhin a per zawh hnu khan thupha chawiin a ban a phar hial a nih kha...

'Kumpinu rorelna hnuaiah ni a tla ngai lo' tih ṭawngkam lar tak hi tun ang lai England nipui laia zan dar 11 vela khua a thim leh zing dar 3 vela kawl a en leh mai sawina ni loin khawvel ram zau tak an lo awp ṭhin sawifiahna a ni zawk.

Tunlai khawvel politics-ah chuan ni chiah tawh lo mah se tun kum li chhung chuan cricket khawvelah Kumpinu ram hi a êng ber hrih dawn ta chu a nia. World champion England tan nui chunga faifuk a har ang bawkin, chapona tur a tlem hle a, Kiwis ho tan erawh khuanu remruat dan hi a 'fair' zan lo ṭhin a ni e tih an hriat belhna ni a ni. 

Khatiang ang inkhel ropui, World Cup final lehnghal chu damchhung tawite hian kan hmuh leh ngai pawh ka ring meuh tawh lo. Engtik niah emaw chuan inchhuang takin ka tu leh fate hnenah, "Kha mi zan khan mit pawh khap mang loin live-in kan lo thlir a sin," ka ti ve ngei ang.

He Silly Point column tling lo taka ziak tura min duhsaktu Vanglaini lama kan hotute chungah lawmthu ka sawi a; CAM, BCCI, Star Sports leh ka teammate-te min duhsakna leh puihna chungchangah hian, ka lawmna hi sawiin a siak awm lo e.

World Cup chawhnu lama a hmunah ngei zuk chhim a, ground report pe tura ka inbuatsaih vek tawh hnua, ka thil tum last minute-a mimal rokhawlhna avanga ka puitlin tak loh chungchangah erawh chhiartute hnenah thupha ka chawi.

Tui let hnuah a vawi khat nan England chu an ramah ngei world champion an ni ta a. New Zealand erawh an chak lo tih ṭawngkam ka hmang phal lo, a vanduai zawkah an ṭang a ni e.

Broadcaster Star Sports lamin an show tawp nan an la kual a, hetah hi chuan England lamin nomawi chawi fel tawhin player-te pawh pavilion an lut fel deuh vek tawh a, mipui pawh an ṭin tawh. Lords ground kil khatah England champion puitu Ben Stokes leh New Zealand player James Neesham te inkuah chunga titi bawrh hmuh tur a awm a, ngaihtuah a tithui hle.

Kum thum liam ta khan Stokes hi World Cup T20 final-ah a mualpho a, Neesham hi nikum lawkah nun beidawn vanga inkhelh chawlhsan tum hial a ni thung. Infiamna khawvel chuan player pahnih tan nun thar siamin World Cup final-ah an hming an rawn chher ve leh a, infiamna khawvel hi a lo ropui ber mai e tiin he zanlai pelh ṭhaka ral khata bawhar khuantevika khuangin min awih pah hian ka thuziak hi ka khar ang e.