Novak tih ri ka hria - Djokovic

Centre Court, All England Club-ah Roger Federer ṭantu an tam a, Swiss star in ball a vuak dik apiangin thawm a ring thei hle. Mahse hnehna a chan hnuah Novak Djokovic chuan fans zinga amah ṭantute au thawm a hriat thu a sawi chhuak.

Pathianni zan Wimbledon final inkhel hmuhnawm takah Djokovic hian vawi riat champion tawh hi, 7-6 (7-5), 1-6, 7-6 (7-4), 4-6, 13-12 (7-3) a hnehin a title a humhim. Darkar li leh minute 57 zet an inkhelh chu All England Club-a singles final rei ber a ni.

Kum 32 mi Djokovic chuan, "Mipui kha 'Roger' tiin an aurual nasa a, mahse kei chuan 'Novak' tih ri ka hria," a ti. Wimbledon vawi nga champion tawh chuan sawi zawmin, "Inkhel ka hmachhawn tawh zingah chuan rilru paukhauh a ngaih ber ṭum a ni.

"Hetiang ang inkhel hautak leh ropui chhawp chhuak tur hian nasa takin kan thawkrim a, mipui hmuh duh leh en chak ang chu kan chhawp chhuah ngei pawh ka beisei," tiin inkhel boruak a sawi.

Tennis kum kal laiah grass court season an hmang zo ta chiah a, tunah chuan hard court lam an hawi leh tawh ang. August thla tawp aṭanga khelh ṭan tur US Open chu inelna lian hnuhnung a ni dawn a, a hnu lamah player ṭha zual pariat tan ATP Finals pawh a la awm zui leh ang.