Mipui 141,000 hmaah Hamilton a chak

Pathianni zan khan Wimble­don final, Cricket World Cup final leh British Grand Prix te a awm rual a, heng infiamna lian pathum hi England-ah vek a thleng khawm! Infiamna boruakin a chim mup mup lai hian tualchhung tlangval Lewis Hamilton chuan Formula 1 huangah hnehna a chang.

Infiamna lian dang pahnihte avangin season dang angin F1 hian ngaihhlut a hlawh tawk loh ang tih hlauhthawnna a awm. Mahse, Silverstone tlan kawngah car intlansiak ngainatu fans 141,000 chuang zet an pungkhawm a, an driver ṭan rawn Hamilton-a'n a vawi ruk nan hnehna changa record a siam lai hi lawmpuitu an ṭhahnem hle.

World champion vawi nga ni tawh leh title kawl mektu ni bawk Hamilton-a'n season dang ang bawkin inelna a thunun hneh leh hle a, amah hnaih bertu Valtteri Bottas nen an inkarah second 25 zet a awm tling - tuma el phak lohin hnehna a chang tihna a ni.

World championship table lamah Mercedes driver hian a teammate lakah point 39 ngawtin hma a hruai fal nghal bawk a, kumina inelna 10 an hmachhawn tawh zinga pariatah ngawt hnehna a chan avangin hmahruaitu nih a phu hle.

Kum 34 mi Hamilton chuan, "Hawina lam apiangah British flag hmuh tur a awm a, hetiang taka min hmangaih leh min thlawptu ṭhahnem tak hmaa hnehna chan hlutzia hi ka sawi chhuak thiam lo. Engtik niah mah ka theihnghilh tawh dawn lo, ka hre reng tawh ang," a ti.

Red Bull car a khalh laia world champion vawi li ni thei Sebastin Vettel-a'n team ṭha zawk Ferrari a zawm hnuah beisei angin a la tlan thei lo, BritishGP-ah pawh Vettel hi Max Verstappen nen an inbakkaih palh a, '10-second time penalty' bakah 'two penalty points' pek a ni. German tlangval tan champion beiseina a tlem zel.

Mercedes driver pahnih Hamilton leh Bottas ten Vettel hi an tlan san zel, Ferrar driver pakhat zawk Charles Leclerc erawh pathumnaah thlengin beiseina a la nei zel. Driver beiseiawm berte zinga mi Max pawh buaina nei deuh mah se pangana a ni phak tho.

Car intlansiakna sang ber hi tun season chhungin vawi 21 tlan tur a ni a, a tir lam 10 an tlan tawh. Inelna 11-na atan July 28 hian Hockenheimring, Hockenheim-ah German Grand Prix tlan leh a ni ang.