Vawiinah CYMA Football quarterfinal match hnih Armed Vengin Republic Veng an hneh nawn

Suzuki Gixxer SF 250 20th Inter Branch YMA Football Tournament-ah Hnahthial Joint leh Armed Vengin semifinal an lut a, vawiin hian an hmachhawn tur a hriat ang. Quarterfinal match hmasa berah Hnahthial Joint-in penalty shootout hmangin Salem Veng an hneh a, inkhel hnuhnung zawkah Armed Vengin NECS Cup final-a an hneh hnu Republic Veng chu 3-0 in an hneh ve bawk.

Vawiin chhun dar 12:00 hian Lam­mualah Chanmari leh ITI Veng te an inkhel ang a, heta chak zawk hian Hnahthial an hmachhawn dawn. CYMA Football-a champion tawh zinga la dam awmchhun Armed Vengin semifinal-ah vawiin tlai tlai dar 2:00-a Durtlang leh Bethlehem Vengthlang chak zawk an hmachhawn ang.

Hnahthial leh Salem Veng inkhel­ah Aizawl khaw team an che ṭha zawk a, minute 15-na lekah David. Lalchhuanawma'n Salem Veng tan a rawn khung. Hnahthial an insiamṭha thuai a, Jeremy Laldinpuia ball fing tak chu Jakob Vanlaldinpuia'n sihphurh sut nan a hmang.

Hnahthialin inkhel thunun zawk mah se goal an khung thei lo. Penalty shootout hmangin semifinal lut tur zawn a ni a, penalty hlah hmasatu zawk Hnahthial vanneiin 4-2 in hnehna an chang.

Armed Veng leh Republic Veng inkhel en châk an tam a, khaw chhe hnuaiah Lammmual mawi tham an pungkhawm. Chhum zing vangin minute 10 lek an khelh hnuah hun rei tak inkhel a khaihlak. Team pahnih an inhlauh tawn avangin inkhel a hmuhnawm tawk lo a, Armed Veng midfielder che rang Lalawmpuia'n Republic Veng defender tihsual hmang ṭangkaiin minute 27-naah goal hmahruai a khung. 

Republic Vengin chance ṭha neih an hmang ṭangkai thei lo a, captain F. Lalrinpuia vanneih ni a nih loh bakah tun inelnaa goal 9 khung tawh Lalhriatpuia goal hmaah a hriam tawk lo. Second half-ah Armed Vengin captain F. Lalmuanpuia hmangin game an thunun a, Republic Veng chance insiam tur an dang chat.

Armed Veng forward fing Lalfakzuala'n Republic Veng defender la naupanna chu remchangah lain goal hnih a khung belh. Lalbiaksanga Colney hote khel a puitlin zawk avangin chak an phu zawk a, 3-0 erawh Republic Veng tan pawm thiam a har ang.

Chanmari Veng leh ITI Vengin quarterfinal thleng turin penalty shootout an mamawh ve ve a, keeper tawnhriat nei ṭha MS Dawngliana leh H. Lalremruata te thiamna zara tun dinhmun thleng an ni.

Amaherawhchu an  player neih dan thlirin Chanmari an ṭha zawk a, team ṭha Khawzawl Joint nen penalty shootout a ngai nachungin chak phu zawk an ni. Chanmari hian Rochhingpuia, Lalrinchhana Tochhawng, Lalhiatrenga (Achia), C. Lalhriatpuia leh Rosangliana te an kawl a, semifinal chauh ni loin nomawi an thlir pha ang.

ITI Veng hi nem deuh zawkin lang mah se MPL-a tawnhriat nei Zosangliana'n midfield a ho thei a, an veng defender rinrawl ṭhin  Zohmangaiha coach-na hnuaia an khelh bawk avangin team boruak a ṭha hle. CYMA Football hnuhnung berah Chanmari hi finalist an ni a, ITI Veng pawh hi quarterfinalist niin champion zui ta Ramhlun South lakah penalty shootout-ah an vanduai. 

ITI Veng tan quarterfinal hi thil thar a ni tawh lo a, tun ṭumah chuan an la thlen ngai lohna semifinal thlen phak ngei an tum ang.

Kumin inelnaa an hneh tawh aṭanga thlira team ṭha ber chu Bethlehem Vengthlang an ni a,BVT hian chiang takin player ṭha tamna Chaltlang leh Bawngkawn an hneh. BVT tan captain K. Lalṭhathanga a langsar a, chutihrualin PC Laldinpuia hoa tlarhnung inrem khawngzia hriat tel a ṭha bawk.

An khingpui Durtlang hian Ricky Lallawmawma leh Lalliansanga (Notea) te an kawl a, football-a sulhnu nei ṭha veng an nih bawk avangin BVT hi an hlau bik lo ang. An match hnuhnung ber thlir chuan Durtlang tan BVT hneh turin insiamṭhat fe a ngai dawn a, chutihrualin knockout-ah chuan eng pawh thleng thei a ni.