Crouchy; i liam mai ang maw?

6ft 7in zeta sang nichungin footballer a ni mauh a, pa ṭawng hmang thiam leh fiamthu duh tak a nih avangin, "Football ngainatu tawh phawt chuan an ngaina vek," tiin a chanchin an sawi hial - a hming chu Peter Crouch a ni.  

Khelmual chhungah goal hmangin fan-te a ti hlim a, a pawn lamah a ṭawngkam nalh leh nuihzatthlak tak tak hmangin midang a nuih tir a, mite hlimna thlentu a ni. 

Chutiang taka ngainat rawn hlawh striker chuan khelmual rap leh tawh ngai lo turin a boot a khai ta a, "Ka neih zawng zawng hi football min pek a ni," tiin a hmangaih football chu a mangṭha ta. Mahse, Crouch-a hming erawh kan la hre dawn chauh. Daily Mail chanchinbuah column neiin football chungchang a ziak ṭhin a, 'That Peter Crouch Podcast' tih chu BBC lamah a larpui hle bawk.

England tan vawi 42-a inlana goal 22 khung thei striker hi Tottenham Hotspur aṭanga in zir chhuak a ni a, a thusawi lar tak zingah, "Harry Kane a ṭha hi mak ka ti lo, ka zirtir hnem hman em a ni," a tih chu a tel!

Mahse, Spurs-a a hun hmasa lamah hian a tlatlum lem lo. Kum 17 mi lek a nih laiin Spurs striker duhthlan 11-na vel a ni a, non league club Dulwich Hamlet-ah loan-a an kaltir hnuin Swede club IFK Hassleholm-ah te loan-in an kaltir leh!

Crouch chuan, "Khatihlai khan England tan vawi 42 inlanin goal 22 ka la khung ang a, Liverpool tan Champions League leh FA Cup final ka la khel ang a, ka goal khung chuan hun rei tak hnua a vawi khat nan Tottenham chu European Cup-ah a hruai kir leh dawn a ni, tiin min hrilh ni ula, eng khaw sawi set set loin bawmah ka kalh khum duh ang che u."

"Mahse, chung zawng zawng chu a thleng miau si," tiin a duhthusam ram zawng zawng a thlen dik thu a sawi a, "England tana ka fehchhuah ṭuma ka pa nena kan inbiakna pawh ka la hre reng a ni," a ti a, a hun tawn a ngaihlu hle. 

England, Spurs leh Liverpool tan a khelh hman miau avangin Crouch-a'n player ropui tak tak a khelhpui a, a hmachhawn ṭeuh bawk - mahse jersey inthlengpui erawh a nei tam lo. 

Crouch chuan, "Ka office cheimawi hna ka thawk mek a, ka hun tawn hlimawm tak tak aṭanga ka thlalak te ka tar kual hlawm. Kum 2007 Champions League semifinal-a Chelsea nena kan inhmachhawnna te, World Cup-a England jersey ha chunga ka chhuak lai te,"

"Queen Park Rangers tana ka goal hmasa ber Gillingham laka September 2000-a ka khung lai te, FA Cup ka chawi laite ka dah a ni." "Inkhelh zawha jersey inthleng vel hi ka ti ngai vak lo a, mahse hriatreng tur sulhnu tam tak erawh ka khawm a, ka tute hnenah ka thawnthu hi ka la sawi ṭhin ang. He footballer hlui hian nun nuam tak a hmang a, tunah chuan bung thar keu a ngai ta," a ti. 

QPR, Portsmouth leh Stoke tan a khelh laia Club Player of the Year ni vek thei Crouch hian Liverpool tana a khelh chu hriat a hlawhna ber tia chhal ngam a ni a, a nomawi chawi awmchhun FA Cup leh Community Shield pawh he club-ah hian a chawi. 

Reds tan vek hian Champions League final leh FIFA Club World Cup final a khel chungin nomawi erawh a hlawh chhuak zo lo a, silver-ah a lungawi a ṭul. Fans ṭhenkhatin Crouchinho tia an koh fiam striker hian a mimal season hman ṭhat ber tia chhal ngam chu 2006-07 season khan Liverpool-ah a hmang a, match 49-ah goal 18 a khung. 

Liverpool-in Champions League final an luh nan khan a thawhhlawk takzet bawk a, goal ruk ngawt a khung - goal 10 khungtu, final-a an ngam loh tak AC Milan thiampuipa Kaka (10) chiah a tluk lo.  

Crouch hian larpui tak pakhat a nei a, chu chu a goal khung lawm nana a 'robot dance' ṭhin chu a ni. Kum 2006 khan Hungary laka goal a khung ṭumin Crouch hian he 'dance move' hi a goal khung lawm nan a hmang ṭan a, goal pawimawih bik a khung a nih loh chuan he 'celebration' hi a hmang zen zen lo thung. 

English striker hian Premier League bikah match 468 khelin goal 108 a khung a, a lu hmangin goal 53 a khung - hei hi Premier League record dinglai a ni a, ani tluka lu hmanga Premier League-a goal khung hnem an awm lo. 

Tun dinhmunah chuan BBC lama 'That Peter Crouch Podcast' tih chu a larpui hle a, he podcast programme-ah hian football chungchang ngaihnawm takin a sawi ṭhin. 

He 'show' hi a hlawhtling bawk a ni ang. Ama pualin kutpui "Crouchfest' a neih phah - hetiang mihring hi an tam lo! Mahse, tunah zawng, i liam mai ang maw? tiin Crouchy koh a lo ṭul ta. 

1 –    Stoke tana Man City laka a volley 

(March 24, 2012)

2 –    Scissor-kick; Liverpool v Galatasary (September 27, 2006)

3 –    Kop ho hma ngeia a ke veilam hmanga Arsenal laka a hattrick siamna goal a khung kha 

(March 31, 2007)

4 –    Scissor-kick; Portsmouth v Stoke 

(October 5, 2008)

5 –    Champions League-a Spurs an kir theih nana City laka a goal khung (May 5, 2010)