RSC hmaah Chanmari Vikings

Zanin dar 6:30 hian Mizoram Super League season 6 inkhel pakhat a awm dawn, semifinal hmun ruak inchuh tura ngaih Ramhlun Sporting Club leh Chanmari Vikings te chu Hawla Indoor Stadium, Republic Vengthlangah an inkhel ang.

Team paruk inel ten match an nei kim tawh a, champion lai Zarkawt BCA leh Khatla TBL ten vawi hnih hnehna chang tawhin semifinal an luh a rinawm, vawi khat chak tawh Tuikual South pawh rinkai zingah a telh theih. Zanina inkhel tur Chanmari Vikings leh RSC te bakah Chawnpuiin hnehna an la chang lo, zaninah team pakhat zawk chuan hnehna an chang dawng tih a chiang - team inel tur an nih avangin chak zawk nih a pawimawh dawn.

Ramhlun team hian an match hmasa zawkah BCA an ngam lo hle, tualchhung player hlanga khel an nih bakah inelna sang an hmachhawn vawi khatna a nih avangin dah san an har rih; thawhhona ṭha tak nen an bei a nih erawh chuan beisei an nei thei ang. TBL lakah Vikings an khel ṭha viau a, forward Reymond Miller Jr-a'n training nei tam hman lo chungin khel mah se point 28 a neih bakah rebounds vawi 13 lain double double a nei nghal. United States tlangval hi zaninah pawh en rawn hlawh bik a ni ang.