Sarri-a nau thar Ramsey tan beiseina leh Juventus

Arsenal thiampuipa ṭhin kha Juventus midfielder a ni dawn ta a, Aaron Ramsey-a'n Italian club tana a khelh hun tur thlirin a phur tawh hle. 

Ramsey phurna belhchhahtu pakhat a awm - Maurizio Sarri chu Juventus coach thar a ni a, Chelsea boss hlui hi Ramsey hian a hriatchian sa manager a nih thu a sawi. Season hman zawh tak Europa League final-ah khan Sarri enkawl Chelsea chuan Ramsey khelhna Arsenal an hneh a, Welsh midfielder-in a coach thar a hrechiang hi a mak lo. 

Ramsey chuan, "England-a a hun hman avang khan Sarri hi ka hria a, football dik tak khelh duh mi a ni," tiin a coach thar chu a fak. 

Maurizio Sarri-a'n a naute khelhtir dan bik a nei a, chu chu a hmingah 'Sarriball' tih an vuah - 'Sarrismo' tiin an sawi ṭhin bawk. 

Sarri-a'n a naute a khelhtir ṭhin dan hi 'vertical tiki-taka' tia sawi theih a ni bawk a, defence aṭanga rang tak taka short pass-a ball inpe kualin, a rang thei anga khingpui goal lam hnaih chu a kalphung a ni. Ramsey chuan, "Sarri hian kalphung bik a nei a, player dangte pawhin a kalphung hi an man thuai ka ring. Season hmasaa ka thil hmuh aṭanga teh tur a nih chuan Chelsea-ah khan a hlawhtling hle a ni. 

"Europa nomawi a chawi bakah League Cup final a lut a, league-ah top four a hruai thleng bawk. A khelhtir dan hmang leh hriatna kan chhawr ka beisei tlat a ni," a ti. 

Juventus hian Wales player ropui zinga chhiar hmaih ni ngai lo John Charles an kawl ṭhin a, 'Il Gigante Buono' (Palian ngainatawm) tia hminglem an pek forward hnungzui a tum thu Ramsey chuan a sawi. 

Welsh midfielder chuan "Juve-ah mai ni lo Wales-ah pawh legend a ni a, a sulhnu ropui tak hnutchhiah ang kha hnutchhiah ve theih ka in­bei­sei," a ti. Charles hian Juventus-ah kum nga (1957 - 1962) hun a hman chhungin Serie A title (3) leh Italian Cup (2) a la hman a, Wales chu tun thlenga an World Cup khelh chhun ni turin 1958 khan quarterfinal a luhpui bawk. 

Centre back anga khel thei bawk Charles hian Juventus tan match 155-ah goal 108 a khung thei a, Omar Sívori leh Giampiero Boniperti te nena an inkawp chu 'The Magical Trio' tih hiala hriat an ni ṭhin. 

Ramsey hi tun nipui transfer rual khan Arsenal-ah a contract a zo a, hei vang hian January aṭang khan a duhzawng club be turin zalenna a nei - February khan Juventus nen hian an inrem. 

Turin club-ah hian Ramsey hian kar khatah £400,000 chuang a hlawh dawn a, khawvela foot­baller hlawh hnem ber pawl a nih dawn avangin beisei a sang dawn. Kum 28 mi midfielder chuan, "Juventus-in min duh tih ka hriat khan khawvela club lian ber pawl an nih avangin ka hnar phal ngang lo. He hmuna lokal a, he club tana khelh hi ka tan chuan mumang ang mai a ni," a ti. 

Arsenal tan vawi 369 inlana goal 64 khungtu hian Italian ṭawng a zir mek a, Turin a thlen hunah zir chhunzawm a tum thu a sawi - Wales tana a khelhpui Gareth Bale chuan Spanish ṭawng a hriat loh avangin Real Madrid-ah sawisel a hlawh hle.

Arsenal tana FA Cup no­mawi pathum chawitu Ramsey hian Gunners tan a khelh laiin jersey number 8 a ha ṭhin a, hei hi fan-te ngainat rawn Claudio Marchisio hak ṭhin a ni. 

September 2018-a  Russian Premier League club Zenit Saint Petersburg pantu Marchisio hian Juventus tan season 11 a khelh chhunga Serie A nomawi pasarih chawitu sulhnu chhui hi a hautak dawn. Mahse, Wales tan vawi 58 inlana goal 14 khungtu Ramsey chuan, "Arsenal-a ka hak ṭhin number 8 ngei kha hak ka duh a, hatu an awm rih lo tih ka hriat kha chuan ka chuh vat a ni. 

"Marchisio sulhnu ropuizia ka hria a, Juventus tana a hnathawh ang kha ka thawk ve thei a nih phawt chuan ka inchhuang khawp ang," a ti a, Marchisio anga hlawhtlin a inbeisei.