Chanmari leh Bethlehem Vengthlangin CYMA football semifinal an lut

Suzuki Gixxer SF 250 20th Inter Branch YMA Football Tournament quarterfinal chu nimin khan khelh zawh a ni a, Chanmari leh Bethlehem Vengthlangin semifinal an lut. Chanmari hian ITI Veng 3-1 in an hneh a, BVT-in penalty shootout hmangin Durtlang an hneh ve bawk.

CYMA Football semifinal hi July 18, Ningani hian Lammualah khelh a ni dawn. Chhun dar 12:00-ah vawi nga champion tawh Armed Veng leh BVT an inkhel ang a, tlai dar 2:00-ah Hnahthial Joint leh Chanmari ten final khel tur an zawng ang.

Chanmariin minute 12-naah Rosangliana hmangin an khung a, team goal mawi tak a ni. Midfielder Lalhriatpuia vawrh chu dinglama awm RS-a'n changin Chhinga leh Hriatpuia te inrawlhin Durtlang tlarhnung an ṭhiat a, RS-a hian a tawp a khar.

Minute hnih hnuah ITI Vengin TC Lalhuapzauva goal mawi bik hmangin an chhanglet a, box chhung chiahah ball la thlain kawh zetin a hlap lut. Amaherawhchu minute 36-naah Chanmari bawkin hma an hruai a, Chhinga corner pet chu Lalrinchhana Tochhawngin la thlain a shot-siam chu V. Lalruatsanga'n goal-ah a chantir.

Second half-ah team ṭha zawk Chanmari tan Chhinga a rawn inlar a, box pawn aṭangin freekick mar pawta petin ITI Veng keeper H. Lalremruata'n a dang thei lo. CYMA Football 2017 finalist Chanmariin semifinal an thleng leh ta a, an la chawi loh nomawi chawi turin match hnih dang chak an la mamawh.

Bethlehem Vengthlang leh Durtlang ten hun pangngaiah goal khat ve ve an khung a, penalty shootout-ah team ṭha zawk BVT-in 4-2 in hnehna an chang.

Quarterfinal match hnuhnung berah player ṭha danglamna a lang a, minute 24-naah BVT tan tawnhriat nei ṭha Lalrammawia'n box chhunga a chance neih chu a hlap lut. Durtlangin BVT keeper Lalmuansanga tan hna siam sak ve tho mah se inkhelah BVT an chungnung hret a, Durtlang keeper Lalrinhlua hna a hautak zawk. Coach Lawmzuala Pautu hote goal hmaah an vanneih ṭum a ni a, offside vangin Zaithanmawia tauh luh pawmsak a ni lo a, hun tawp thlengin an dinhmun a him lo.

Injury time-ah Durtlang player Lalchungnunga'n a chance neih chu goal zawn hrim hrima a pet rah a seng a, keeper Muansanga'n nam chhuak sualin an clear hmain ball-in goalline a pel hman. Penalty shootout neih chhunzawm nghal a ni a, BVT keeper Muansanga'n a tihsual siam ṭhat nan Jessy Vanlalmuana leh Lalsanglura te penalty pet chu ṭha zetin a dan sak ve ve. BVT tan captain K. Lalṭhathanga'n a tawp rawn kharin 2002 CYMA football finalist hian nomawi an beisei zel e.

July 15, Thawhṭanni

Hnahthial Joint    1 - 1    Salem Veng

Penalty Shootout-ah Hnahthial 4-2 in an chak

HNA : Jakob Vanlaldinpuia 20'

SAL : David. Lalchhuanawma 15'

MoM: K Lalrinfela, Hnahthial

Republic Veng    0 - 3    Armed Veng

ARM : Lalawmpuia 27'; Lalfakzuala 79', 87'

MoM: F Lalmuanpuia,  Armed Veng

July 16, Thawhlehni

Chanmari    3 - 1    ITI Veng

CHA : Rosangliana 12'; V. Lalruatsanga 36'; Rochhingpuia 71'

ITI : TC Lalhuapzauva 14'

MoM: Rochhingpuia,  Chanmari

Durtlang    1-1    Bethlehem Vengthlang

Penalty Shootout-ah BVT 4-2 in an chak

DUR : Lalchungnunga 90+4'

BVT : Lalrammawia 24'

Semfinal - July 18, Ningani

SF1    Armed Veng    12:00 PM    Bethlehem Vengthlang

SF2    Hnahthial Joint    02:00 PM    Chanmari

Final - July 20, Inrinni - 3:00 PM