Khabib vs Ferguson a thleng dawn lo
Hneh loh la tawng lo UFC lightweight champion Khabib Nurmagomedov chuan Tony Ferguson nena fight an neih tur chu ṭhulh a nih thu social media kaltlangin a puang a, Covid-19 hri leng kara fight kaltlangpui chu thil tih chi nia a hriat loh thu a sawi.
UFC fighter ropui pahnih hi April 18 khian New York khawpuiah intawng tura tih an ni zet a, mahse UFC 249 hi coronavirus hri leng vangin neih an tumna hmun New York-ah hian neih theih a ni lo.
Heti chung hian fight hi thlentir tuma ruahmanna kalpui reng a ni. Mahse, New York hnua an duthlan UAE chuan ramri a khar zui ve leh a, Khabib hi Russia-ah awmin a zin chhuak thei lo.
Vawi 28 fight a hmachhawn tawha tlawm la nei lo Khabib chuan, "He fight a thleng thei lo tur hi nangni ai mahin hrehawm ka ti zawk a ni," a ti a, Ferguson nena an fight tur ṭhulh a ngai chu a duhthlanna a nih bik loh thu a sawi.
Khabib hi fight a thlen theih loh chhanah mi tam tak chuan an ngai a, UFC 249 hi neih dan an la zawn reng bawk si avangin fight hmuhnawm ber tura ngaih a thleng thei lo tur hi mi tam takin an hrethiam lo.
Russian fighter tih eltu zingah a hmachhawn tura tih Ferguson ngei pawh a tel a, American fighter hian Khabib chu chhuanlam leh bih rukna tur zawng rengah a puh a ni.
Mahse, Khabib chuan, "Khawvel pumpui a reh ṭhuap a, ram tin sorkar leh mi lar tak tak ten ina tawm turin min ngen chamchi a, hri leng darh zel tur do nan pawna chhuak lo turin min duh. Chutihlaiin kei hi engtin nge thlawk kualin, fight hmachhawn tura ka inbuatsaih theih ang?
"Sorkar ropui ber ber pawh an mangang a, khawvela company lian ber ber ten tih ngaihna an hre lo. Nitinin thil thlen dan a danglam reng a, fight hi hmachhawn theih a ni lo. Ka dinhmunah in dah ula, ka sawi awmzia in man thiam ka ring. Lo inenkawl ṭha rawh u," tiin a dinhmun a sawifiah a, a fan-te chu amah hrethiam turin a ngen.
Khabib vs Tony - a thleng thei lo
*2015 - Khabib-a'n a nakruh lamah hliam a neih avangin a inhnukdawk
*2016 - Ferguson-a'n a chuap lamah harsatna a tawk a, a inhnukdawk
*2017 - Ferguson-a'n a kal (kidney) lamah harsatna a nei a, ṭhulh a ni.
*2018 - Media an hmachhawnna lamah Ferguson-a chesual a, a khupah hliam a neih avangin a vawi li nan Khabib vs Tony chu ṭhulh a ni.
*2019 - Covid-19 hri leng vangin Russia-ah Khabib a tangkhang a, fight neih theih a ni lo.