Hero Intercontinental Cup Chak nei loin India an tawp

All India Football Federation hnuaia inelna Hero Intercontinental Cup-ah India chuan chak nei loin inelna an khar a, an match hnuhnung berah Syria chu 1-1 in an inhnehtawkpui. 

Thawhṭanni zan khan North Korea chuan Tajikistan an hneh avangin final lut tura India beiseina an tihtawp sak a, beisei tur nei tawh lo India-in draw result an hlawh chhuak hram. India tan Narender Gahlot chuan minute 52-naah goal hmahruai a khung a, Firas Al-Khatib chuan Syria tan penalty aṭangin si phurh a rawn sut - minute 78-na a ni tawh a, goal dang lut loin an ṭin. 

Blue Tigers hian match thum an khelh aṭangin point khat chiah an nei a, point ruk ve ve neitu Tajikistan leh North Korea te chuan July 19 zan dar 8:00-ah final an khel ang. 

Blue Tigers goal neih chhun khungtu Narender Gahlot kha kum 18 leh ni 83 mi a ni a, India tana goal khung thei naupang pahnihna a ni. 

Blue Tigers tana goal khung thei naupang ber record chu Jerry Zirsanga'n a la chelh reng a, May 2004 khan Mohun Bagan midfielder hlui hian India tan Kuwait lakah goal a khung. India tana vawi nga inlan ve hman Jerry hi ram tana goal a khung khan kum 16 leh ni 311 mi lek a ni a, hetihlai hi Stephen Constantine-a'n India a enkawl hmasak kha a ni. 

Lallianzuala Chhangte chu India tana goal khung thei naupang palina a ni a, Delhi Dynamos winger hian kum 18 leh ni 140 mi niin Nepal lakah 2015 khan goal a lo khung tawh. 

Tun dinhmunah Mizo zinga India regular player tia koh ngam chu Jeje Lalpekhlua chiah a ni rih a, mahse Hnahthial tlangval hi khup zai vangin tun inelnaah hian a inlan lo. 

Lallianzuala Chhangte leh Jerry Lalrinzuala te chu squad-ah hian telh an ni a, an chhe lo. Lianzuala hi match thumah a inlan kim vek a, match hnihah bul ṭanin match khatah bench aṭanga luhtir a ni. Lunglei tlangval Lianzuala hian tun inelnaah goal khat a khung a, assist vawi khat a nei a, penalty vawi khat a hlawh chhuak bawk. Syria lakah erawh goal ruakah a khung lo. 

Jerry-a'n bench aṭanga lutin match hnih a khel a, Bethlehem tlangval hian Syria lakah penalty a chawi a, mikhual team-in si phurh sut nan an hmang. 

India coach Igor Stimac-a'n squad-a siksawi nasa a, Blue Tigers dinhmun chu thlak danglam a tum thu a sawi - Croatian coach hian result a dah pawimawh hmasa rih lo a, tu nge India tan ṭha ber ang tih chu a en mek. 

Stimac hian, "Tunah chuan khel tura ka duh player-te ka hrechiang tawh a ni," tiin a lo sawi tawh a, a system-ah hian Lallianzuala chu hmun pawimawh chang phak tura beisei a ni. Tun hnaia India tana koh Mizoram player zingah Lalruatthara, R. Laldanmawia leh Daniel Lalhlimpuia te chu Stimac hian a la ko lo a, Indian Super League/I League ṭan hun an nghah phawt a ngai dawn niin a lang. 

Jeje erawh a dam hunah a ko leh mai tura ngaih a ni. Stimac hian, "Kan tan a pawimawh a ni," tiin Mizo Sniper dam hun a nghahhlelh thu a lo sawi tawh.