FIFA 20-ah Juventus tel dawn lo

Football games lar, EA Sports-in an siam ṭhin chhuak thar ber tur FIFA 20-ah Juventus an awm ve dawn lo - Italian club ṭantute chuan an club hming zawn tur an nei dawn lo a, Piemonte Calcio tih erawh an hmu dawn!

Calcio-ah hian Juventus player dik tak erawh hman vek an ni dawn a, Cristiano Ronaldo fan-te pawhin an player duhtak hi an la hmang thei dawn tho. Juventus tih aiah Piemonte Calcio tia koh an ni dawn, tih zawng a ni. 

EA Sports-in Juventus hming an hman theih loh chhan hi Pro Evolution Soccer 2020 siamtu Konami leh Juventus an thawhdun dawn vang a ni a, EA tan FIFA lama Juventus hming hman ve reng a rem lo. 

Juventus hming an hmang thei lo chunga player an hman theih chhan erawh FIFPro nena an thawhdun vang a ni a, player inzawmkhawm pawl FIFPro hian PES leh FIFA an thawhpui ve ve. Licensing leh partnership chungchanga game developer-te thawhhona hi thil thar a ni lo a, mahse Juve leh PES thawhdunna erawh a danglam - Italian champion hi PES hian an pumbilh dawn. 

Nikum khan Liverpool, Arsenal, AC leh Inter Milan te chuan PES thawhpui chungin FIFA lamah pawh an lang tho. Hetihlai hian EA chuan 'official video game partner' atan Liverpool nen hun rei zawk atan inremna an siam thu an puang zui zat a, gaming khawvela FIFA leh PES indona pawh a sang zel dawn niin a lang.