Federer hrethiamtu Toni Nadal
Hun rei tak chhung Rafael Nadal lo enkawl tawhtu Toni Nadal chuan, Wimbledon final-a chak lo zawk Roger Federer rilru nat dan tur a hriatthiampui thu a sawi chhuak.
July 13, Pathianni zana Wimbledon final inkhel rei berah Federer hi Novak Djokovic lakah a vanduai, championship point a hmuh pahnih a chhawr ṭangkai thei lo a, a tawpah a chak lo zawkah a ṭang.
Toni Nadal chuan, "Final an khelh hma kha chuan champion turin ka duhsak ve ve, set ngana an khelh lai kha chuan a tu zawk pawh kha an chak lo mai ang tih ka lo hauthawng ve em em ringawt tawh.
"Kum 2007 pawh khan set nga khelh hnuah Roger hi a chak lo zawkah a ṭang tawh. Australian Open final-ah pawh vawi hnih a vanduai zawkah a ṭang tawh bawk, player tawnhriat ngah tan pawh inkhel inhnehtawk taka a tlawm zawk nih chu a na, player tam zawk ni se tuar thiam harsa an ti khawp ang," a ti.
Spanish coach Toni hian Nadal a enkawl rei avangin Federer nena inelna boruak a tawng hnem a, a unaupa fapa Nadal nen ngei a chak lo lama an ṭan ve fo avangin inkhel pawimawh leh chhinchhiah reng tura chak lo zawk nih natzia a hrethiam.